जुम्ला—सिमकोट गाउँपालिका–२ की २५ वर्षीया रुप्सी बोहराले ५ भदौमा दोस्रो सन्तानका रूपमा छोरी जन्माइन् । बोहरा रक्त अल्पताबाट ग्रसित भइन् । रगतको आवश्यकता प¥यो ।
तर, रगत पाउन निकै कठिन भएको सुत्केरी बोहराका श्रीमान तिलक बोहराले बताए । ‘यहाँको एक मात्र जिल्ला अस्पतालमा संवेदनशील ब्लड बैक रहेनछ । यो सरकारको लापरवाही हो’, उनले भने । हिमाली क्षेत्रको जिल्ला अस्पतालमै सामान्यदेखि जटिल उपचारसम्मका लागि अति आवश्यक पर्नेमा ब्लड बैक छैन । ‘जिल्ला अस्पतालमै पर्याप्त स्रोत—साधन नहुनुले हाम्रो पनि मनोबल घट्दै गएको छ,’ बोहरा भने ।
दुई दिनदेखि जिल्ला अस्पतालको वर्थिङ सेन्टरमा रक्तस्रावले थला परेर गम्भीर अवस्था भएकी बोहरालाई ६ भदौमा जिल्ला प्रहरी कार्यालय हुम्लाका असई थमनसिंह घर्तिमगरले बी पोजेटिभ रगत दिएपछि ज्यान बचाउन सफल भएको बोहराले जानकारी दिए ।
जिल्ला अस्पताल हुम्लामा ब्लड बैक नहुँदा सेवाग्राहीले सास्ती खेप्नु परेको यो त एक प्रतिनिधी घटनामात्रै हो । जिल्लामा रहेको एक मात्र जिल्ला अस्पतालमा ब्लड बैक नभएपछि रगत आवश्यक पर्ने अधिकांश सेवाग्राहीहरूले सास्ती खेप्नु परिरहेको छ ।
जिल्ला अस्पतालमा सुत्केरी गराएपछि अधिकांश सुत्केरी महिलाहरूलाई रगतको आवश्यकता पर्ने गर्दछ । तर, सो कार्यालयमा विगत लामो समयदेखि उक्त सेवा नहुँदा सुत्केरीलाई समस्या हुने गरेको छ ।
अधिकांश सुत्केरी महिलाहरू जिल्ला अस्पताल भरपर्दो भन्दै सुत्केरी हुने समयमा सदरमुकाम सिमकोटमा आएर बस्ने गर्दछन् । तर, उनीहरूका लागि जिल्ला अस्पतालमा कुनै भरपर्दो सामग्री नहुँदा बिरामीहरूले अकालमै ज्यान गुमाउनुपर्ने र जिल्ला बाहिर जानुपर्ने बाध्यता रहेको छ ।
जिल्ला बाहिर जानु पर्दा पनि समयमै हवाई जहाजको पहुँच नहुने, आर्थिक स्रोतको भारलगायतका समस्याले दुःख झेल्नु परेको अर्का स्थानीय अर्जुन बोहराले बताए । उनका अनुसार अन्य जिल्ला जस्तै सुविधासम्पन्न भइदिएको भए यहाँका बिरामीलाई कष्ट भोग्नुपर्ने थिएन ।
हुम्लामा यस्ता घटनाहरू धेरै हुने गर्दछन् । जसका कारण महिलाहरूले अकालमै ज्यान गुमाउनु परेको छ । गत दुई वर्षमा जिल्लामा दुई जनाको रक्त अल्पताकै कारण मृत्यु भएको थियो ।
स्वास्थ्य सेवा कार्यालय हुम्लाका प्रमुख प्रेमबहादुर सिंहले ब्लड बैंक स्थापना गर्नका लागि धेरै आर्थिक लगानी गर्नुपर्ने भएकोले रकम अभावमा स्थापना गर्न नसकेको बताए । हालसम्म त्यस्ता खाले घटना आएपछि बाहिरका व्यक्तिहरूबाट सहयोग मागेर काम चलाउँदै आएको उनको भनाइ छ ।
