जुम्ला—हुम्लाको सर्केगाड गाउँपालिका–३ उनापानी गाउँकी ३५ वर्षीया धनशोभा कामीको मृत्यु भएको छ । गाउँका धामी झाँक्रीकै भरमा औषधि उपचार नगरेपछि कामीको मृत्यु भएको हो ।
औषधि उपचार नगरी धामी झाँक्रीको भर पर्दा श्रीमतीको ज्यान गएको मृतकका श्रीमान दल कामीले बताए । पुरानो संस्कारअनुसार धामी झाँक्रीलाई देखाए सन्चो भइहाल्छ भन्ने मान्यताले पत्नी गुमाउनु परेको कामीले दुःख व्यक्त गरे ।
‘आमाको मृत्युसँगै चार जना बालबालिकाको समेत बिचल्ली भएको छ,’ उनले भने । एक सातादेखि उच्च रक्तस्रावले थला परेकी कामीको उपचार नपाएरै मृत्यु भएको हो ।
रक्तस्रावले थलिएकी धनशोभालाई सात/आठ गाउँका धामी झाँक्री राखेर झारफुक गराउँदा निको नभएपछि उपचारका लागि स्वास्थ्य केन्द्र लैजाने क्रममा मृत्यु भएको पति कामीको भनाइ छ । सर्केगाड गाउँपालिका–३ को गुसा लेखबाट सर्केगाड गाउँपालिका केन्द्र उपचारका लागि लैजाने क्रममा जोगीधार भन्ने ठाउँमा उनको मृत्यु भएको थियो ।
श्रीमतीको मृत्युपछि कामी साना चार जना छोराछोरी कसरी पाल्ने भन्ने चिन्तामा परेका छन् । कामीका दुई छोरा, दुई छोरी छन् ।
आर्थिक अवस्था अत्यन्तै दयनीय भएकोले बालबालिकालाई साँझ, बिहानको छाक जुटाउन समेत मुस्किल भएको सर्केगाड गाउँपालिका–३ का स्थानीय जनक फडेराले बताए । ‘बालबच्चाको पढाइ लेखाइ त परको कुरा भयो । श्रीमति हुँदा कहिलेकाहीँ मजदुरी गर्न जिल्ला बाहिर जान्थे । अब बालबालिका कता छोडौं के गरौं भन्ने पिरलो थपिएको छ’, उनले भने ।
उनले बिरामी श्रीमतीलाई उपचार गराउन जिल्ला बाहिर लैजान रकम नभएपछि धामी झाँक्री गुहार्नु परेको बताए । ‘गरिब भएर जन्मिनु पीडा भयो । रुपैयाँ नहुँदा श्रीमती जोगाउन सकिएन । चार जना बालबालिकालाई साँझ बिहानको छाक टार्नै मुस्किल भयो,’ उनले भने । यस्तो समस्या हुने जानकारी भएको भए पहिले नै उपचारका लागि गुहार मागेर समेत खर्च जुटाउन प्रयास गर्ने उनले बताए ।
