जुम्ला—हुम्लाको नाम्खा गाउँपालिका–५ स्थित हिल्साका नागरिक स्वास्थ्य सेवाबाट बञ्चित भएका छन् । हिल्सामा स्वास्थ्य चौकी नहुँदा नागरिक स्वास्थ्य सेवाबाट बञ्चित भएका हुन् ।
हिल्सामा स्वास्थ्य चौकी नभएपछि बिरामीलाई उपचार गर्न समस्या भएको भन्दै हिल्साका स्थानीय नागरिकले पटक—पटक उपचारको व्यवस्था गर्न माग गरेका छन् ।
हिल्साका स्थानीय नागरिक बिरामी भएपछि ३० किलोमिटर टाढा रहेको चीनको ताक्लाकोट जानुपर्ने भएपछि गाउँपालिका र स्वास्थ्य सेवा कार्यालयसँग स्वास्थ्य चौकी स्थापना गरेर नियमित उपचारको व्यवस्था गर्न माग गरेका हुन् ।
हिल्साका व्यवसायी मुकामबहादुर तामाङले बिरामीका लागि उपचार गर्ने निकाय हिल्सामा नभएका कारण स्वास्थ्य चौकी स्थापना गर्न आवश्यक रहेको बताए । उनले भने, ‘हिल्सामा कोही बिरामी भए चीनको ताक्लाकोटमा गएर उपचार गर्नुपर्ने बाध्यता छ ।’
गाउँपालिका र स्वास्थ्य सेवा कार्यालयसँग सामान्य उपचारको व्यवस्था गर्न समेत उनले आग्रह गरेका छन् । ताक्लाकोट लगिने बिरामीहरू सीमा पास प्राप्त गरेकाले मात्र जान पाउँछन् भने सीमा पास नभएका बिरामीहरूलाई भने दुई दिन लगाएर जिल्ला अस्पताल लगिने गरिएको उनले बताए ।
सशस्त्र प्रहरीले प्राथमिक उपचार गर्नुपर्ने बिरामी भए औषधी उपलब्ध गराउने जनाएको छ । सशस्त्र प्रहरी, नेपाल प्रहरीबाहेक हाल हिल्सामा ६० घरधुरीका ५ सय ५० स्थानीय बस्दै आएका छन् ।
कोभिड—१९ पछि चीनले हिल्सा नाका दुईतर्फी सञ्चालन गर्दा नाम्खा गाउँपालिकाले अस्थायी स्वास्थ्य चौकी र कोभिड—१९ परीक्षण डेस्क स्थापना गरिएको भएपनि हाल बन्द भइसकेको छ ।
हिल्साका स्थानीयको उपचारलाई मध्यनजर गर्दै कर्णाली प्रदेश सरकारको ५० लाख रुपैयाँ आर्थिक सहयोगमा स्वास्थ्य चौकी स्थापना गरिएको भएपनि हाल सो बन्द छ ।
नाम्खा गाउँपालिका स्वास्थ्य शाखा संयोजक ग्याछो लामाले भने, ‘हिल्सामा पहिलेदेखि नै स्वास्थ्य संस्थाका लागि भवन निर्माण गरेको भएपनि अस्पताल, स्वास्थ्य चौकी र स्वास्थ्य इकाई के हो भन्ने जानकारी नै भएन् ।’
स्वास्थ्य चौकी नभएपनि गाउँपालिका स्वास्थ्य शाखाले समय मिलाएर गाउँघर क्लिनिकमार्फत उपचार गर्ने गरेको संयोजक लामाको भनाइ छ । उनले स्वास्थ्य सेवा कार्यालय हुम्लासँग समन्वय गरेर प्रदेश सरकारसँग दरबन्दी माग गरेको बताए ।
