जुम्ला—कर्णाली स्वास्थ्य विज्ञान प्रतिष्ठान जुम्लाले ५० सिट एमबीबीएस कार्यक्रम सञ्चालन गरिरहेको छ । चिकित्सा शिक्षातर्फको पोष्ट ग्राजुएट्स (पिजी) तहको कार्यक्रम त्यसअघि नै सुरु गरेको थियो ।
तर, थोरै विषय मात्रै सञ्चालन छन् । प्रतिष्ठानले पिजी तहमा विषय बढाउने योजना अघि सारेको छ । सोही योजनाअनुसार प्रतिष्ठानले अहिले पिजी तहको सात वटा विषयको पाठ्यक्रम तयार गर्दैछ ।
प्रतिष्ठानले एनाटोमी, फिजियोलोजी, माइक्रोबायोलोजी, बायोकेमेस्ट्री, फरेन्सिक मेडिसिन, फर्माकोलोजी र क्लिनिकल प्याथोलोजी गरी सात विषयको पाठ्यक्रम तयार गर्दैछ । ‘सात वटा विषयको पाठ्यक्रम निर्माण गर्दैछौं । यो वर्ष कम्तिमा छ वटा विषय थप्ने योजना हो । पहिले नै हामीले पाँच विषयमा क्लिनिक विषयमा अध्ययन गराईसकेका छौं,’ उपकुलपति डा. मंगल रावलले भने ।
त्यसो त प्रतिष्ठानले चारवटा स्कुलबाट विभिन्न १३ वटा स्वास्थ्यका अन्य कार्यक्रम सञ्चालन गरिरहेको छ । प्रतिष्ठानका डीन डा. प्रेनितकुमार पोखरेलले योजना गरिएका नयाँ विषयका पाठ्यक्रमलाई अन्तिम रुप दिने अवस्थामा पुगेको भन्दै त्यसपछि चिकित्सा शिक्षा आयोगमा सिटका लागि दावी गर्ने बताए ।
यसैबीच प्रतिष्ठानले थप्ने योजनामा रहेको सात वटा विषयको पाठ्यक्रम निर्माण कार्यलाई अन्तिम रुप दिन सोमबार र मंगलबार काठमाडौंमा पाठ्यक्रम सम्बन्धी कार्यशालाको आयोजना गरेको छ । टेकुस्थित राष्ट्रिय स्वास्थ्य तालिम केन्द्रको हलमा सुरु भएको कार्याशालाको उद्घाटन सोमबार स्वास्थ्य तथा जनसंख्यामन्त्री प्रदीप पौडेलले गरेका थिए । सो क्रममा उनले कर्णाली स्वास्थ्य विज्ञान प्रतिष्ठानले स्वास्थ्य उपचार तथा स्वास्थ्य शिक्षाको क्षेत्रमा महत्वपूर्ण योगदान दिएको भन्दै प्रशंसा समेत गरे । उनले स्वास्थ्य शिक्षामा गुणस्तरीयतामा जोड दिनुपर्ने भन्दै विदेशी विद्यार्थीहरु कर्णालीमा अध्ययन गर्ने बातावरण बनाउनुपर्ने बताए ।
‘नेपालीहरु चिकित्सा शिक्षा अध्ययनका लागि भारत तथा बंगलादेशमा ठूलो संख्यामा अध्ययनका लागि जाने गरेका छन् । त्यहाँका विद्यार्थीलाई पनि यहाँ ल्याउने गरी काम गर्नुपर्छ,’ मन्त्री पौडेलले भने ।
कार्यक्रममा चिकित्सा शिक्षा आयोगका उपाध्यक्ष प्रा.डा. अञ्जनीकुमार झाले पाठ्यक्रमको फ्रेमवर्क आयोगले बनाउने भन्दै त्यसभित्र रहेर नयाँ पाठ्यक्रम बनाउन निर्देशन दिए । उनले स्वास्थ्य शिक्षाको विषयमा गुणस्तर चाहिने भन्दै यसमा आयोगले कम्प्रोमाइज गर्न नमिल्ने समेत स्पष्ट पारे ।
स्वास्थ्य सचिव डा. रोशन पोखरेलले कर्णाली स्वास्थ्य विज्ञान प्रतिष्ठानको परिभाषामा अब दुर्गम शब्द हटाउनुपर्ने भन्दै अब सुगम र सजिलो छ भनेर विद्यार्थी तथा फ्याकल्टीहरुलाई तान्नुपर्ने बताए । उनले भने, ‘बाटो केही अप्ठ्यारो छ । तर, त्यहाँ पुगेपछि दुर्गमको कुनै अनुभव हुँदैन् । त्यसैले दुर्गम भन्न छाडिदिउँ ।’
प्रा.डा. रमेशकान्त अधिकारीले सिमित स्रोत साधनको बाबजुद प्रतिष्ठानले स्वास्थ्य क्षेत्रमा महत्वपूर्ण योगदान गरेको बताए । कार्यक्रममा प्रतिष्ठानका उपकुलपति डा. रावलले प्रतिष्ठानले पछिल्ला वर्षमा गरेका प्रगति र भावि योजना बारेमा विस्तृत रुपमा बताएका थिए ।
प्रतिष्ठानका शिक्षाध्यक्ष डा. डबलबहादुर धामी, निर्देशक डा. पुजनकुमार रोकाय, डीन डा. पोखरेल, रजिष्ट्रार नृपेन्द्र महतले प्रतिष्ठानको वस्तुस्थिति र उपलव्ध गराउँदै आएको सेवाका बारेमा थप प्रष्ट पारेका थिए । कार्यशालामा हरेक विषयसँग सम्वन्धित कम्तिमा ३ जना विज्ञहरु रहेका छन् । उनीहरुले मंगलबारसम्ममा पाठ्यक्रमलाई अन्तिम रुप दिने तयारीमा लागेका छन् ।
