जुम्ला—पातारासी गाउँपालिका–६ बाँता गाउँकी एक सुत्केरी महिलाको निसासिएर मृत्यु भएको छ । आगो बालेर सुतेको अवस्थामा निसासिएर उनको मृत्युु भएको हो ।
सुत्केरी भएको ११ औं दिनमा आगोले सेक्न बालेको कोइलाको धुवाँमा निसासिएर मृत्यु भएको हो ।
पातासारी गाउँपालिका–४ माइती घर भई ६ नम्बर वडा बाँता गाउँमा विवाह गरेर चन्दननाथ नगरपालिका–५ कालेखोलीमा बस्दै आएकी २२ वर्षीया मायालक्ष्मी महतारा निसासिएर गम्भीर घाइते भएकी थिइन् ।
घाइते महतारालाई अस्पताल ल्याएर उपचारको क्रममा निधन भएको उपचारमा संलग्न कर्णाली स्वास्थ्य विज्ञान प्रतिष्ठानका डा. विश्व श्रेष्ठले बताए । उनले भने, ‘धुवाँमा निसासिएर मृतक महताराकी बहिनी जुनमाया रोकया र १२ दिने दूधे बच्चा पनि घाइते छन् ।’ उनका अनुसार बच्चालाई एनआईसीयुमा राखेर उपचार थालिएको छ ।
जिल्ला प्रहरी कार्यालय जुम्लाका प्रहरी नायव उपरीक्षक छेदिलाल कामतीकाअनुसार सुत्केरी महतारालाई अस्पताल पु¥याएको केही समयमै निधन भएको हो । तीनै जनालाई सोमबार बिहान सवा सात बजे उपचारका लागि अस्पताल ल्याइएको थियो । ‘उनीहरू दुई तले घरमा बस्दा रहेछन् । सुत्केरी भएकोले तेलमा मेथी र आगो बालेको पाइएको छ ।’
‘त्यो राति आफन्तहरूको पनि जमघट भएको रहेछ । राति ११ बजे श्रीमान र सासु माथिल्लो कोठामा सुतेछन्,’ उनले भने । प्रहरी घटनास्थल पुग्दा सुत्केरीलाई तताउन आगो बालेको पाइएको र घटनास्थलमा धुवाँको प्रभाव बाँकी नै रहेको पाइएको छ ।
मृतक महतारा र बहिनी रोकाया तल्लो कोठामा सुतेका मृतकका आफन्त तथा नेपाली कांग्रेस जुम्लाका उपसभापति कर्मा बुढाले बताए । ‘सोमबार विहान भने अबेरसम्म नउठेपछि आफन्तले ढोका फोडेपछि घटना थाहा भएको हो,’ उनले भने, ‘अब पोष्टमार्टम रिपोर्ट आएपछि घटनाबारे थप थाहा होला ।’
