वीरेन्द्रनगर—बहुला कुकुरले टोक्दा सल्यानमा पाँच जना घाइते भएका छन् । सोमबार खलंगा र श्रीनगरका विभिन्न स्थानमा बहुला कुकुरले टोक्दा पाँच जना घाइते भएका हुन् ।
बहुला कुकुरको टोकाइबाट प्रधानमन्त्री कृषि आधुनिकीकरण परियोजना इकाई कार्यालयका कार्यालय प्रमुख भीम पाण्डे, इलाका प्रहरी कार्यालय श्रीनगरमा कार्यरत हवल्दार भीमबहादुर खडका, शारदा नगरपालिका–१ पटनेरीकी कमला खडका, धर्मा खडका र बलबहादुर हमाल घाइते भएको जिल्ला प्रहरी कार्यालयका सूचना अधिकारी तथा प्रहरी प्रवक्ता प्रहरी निरीक्षक भवानीप्रसाद धमला बताए ।
इलाका प्रहरी कार्यालय सितल पाटीमा कार्यरत हवल्दार खडकालाई ड्युटीमा रहेका बेला, परियोजना इकाई प्रमुख पाण्डेलाई मोटरसाइकलमा यात्रा गरिरहेका बेला र अन्य स्थानीयलाई फरक फरक स्थानमा बहुला कुकुरले टोकेको प्रहरीले जनाएको छ ।
घाइते भएका सबै जिल्ला अस्पताल सल्यानमा उपचारपछि घर फर्किएका छन् । बहुला कुकुरले अन्यलाई पनि टोकेको पाइएको छ । मान्छेलाई जथाभावी टोक्ने बहुला कुकुरलाई प्रहरी, शारदा नगरपालिकाको पशु शाखा र स्थानीयले नियन्त्रणमा लिएका छन् ।
