वीरेन्द्रनगर—हुम्ला जिल्ला अस्पताल औषधीको अभाव भएको छ । मौसमी बिरामीको संख्या बढ्दै गएपछि हुम्ला जिल्ला अस्पतालमा औषधीको अभाव भएको हो ।
१५ शैय्याको जिल्ला अस्पतालमा वैशाख महिनादेखि औषधी अभाव हुँदा उपचार गर्न आउने बिरामीहरु मर्कामा परेका छन् ।
जिल्ला अस्पतालमा पाइने निःशुल्क औषधीसमेत पाउन नसकेको खार्पुनाथ गाउँपालिका–३ रायाका धनबहादुर टमटा बताए । ‘म बहिनीको उपचारका लागि दुई दिनदेखि भर्ना भएर अस्पतालमा रहेपनि डाक्टरको लेखिदिएको अनुसारको औषधी मेडिकलबाट किनेर लगिरहेको छु,’ उनले भने, ‘चार हजारसम्मको औषधी निजी मेडिकलबाट किने । अस्पतालको फार्मेसीमा भिटामिनसमेत छैन ।’
वैशाख महिनादेखि जिल्ला अस्पतालमा बिरामीको चाप बढेको मेडिकल अफिसर डा. सुर्जनकुमार सिंहले बताए । ‘आइतबार र सोमबारका दिन ८० जनासम्म बिरामी पुग्छन् भने अन्य दिनमा ५० जनाभन्दा कम हुन्छन्,’ उनले भने, ‘लामो समय हुम्लामा पानी नपर्दा मौसमी बिरामीको चाप थपिदैं गएको छ ।’
गाउँ घरबाट एक दुई दिनको पैदल हिडेरसमेत सवारी पुगेको ठाउँबाट जिल्ला अस्पतालमा उपचारका लागि बिरामी आउने गरेको डा. सिंहले बताए ।
