जुम्ला—तिला गाउँपालिका–९ मानेचौरस्थित दुई दिने निःशुल्क स्वास्थ्य शिविरमा ३०४ जनाको स्वास्थ्य परीक्षण गरिएको छ । तत्कालीन घोडेमहादेव र मालिकाठाटा गाविसका ६, ७, ८ र ९ वडा जुम्लाकै दुर्गम क्षेत्र हुन् ।
जुन क्षेत्र अहिलेसम्म सडक सञ्जालमा जोडिएको छैन । त्यो ठाउँमा हरेक सेवासुविधाको असुविधा रहेको छ । जसका कारण पटक—पटक गरिने शिविरमार्फत त्यहाँका नागरिकले सेवा लिने गरेका छन् ।
तिला गाउँपालिका जुम्लाले दुर्गम क्षेत्रका नागरिकलाई सेवा प्रवाह गर्नका लागि ‘जनतासँग उपाध्यक्ष कार्यक्रम’अन्तर्गत दुई दिने स्वास्थ्य शिविर सञ्चालन गरेको हो ।
दुर्गम भेगका महिलालाई स्त्रीरोग सम्बन्धि सेवा दिने उद्देश्यले स्वास्थ्य शिविर सञ्चालन गरिएको गाउँपालिका उपाध्यक्ष गोरीकला बुढाले बताइन् । उनका अनुसार जेठ ४ र ५ गते दुई दिन शिविर सञ्चालन गरिएको हो ।
तिला गाउँपालिका स्वास्थ्य शाखा खोप फोकल पर्सन उत्तम देवकोटाका अनुसार शिविरबाट स्त्रीरोग सम्बन्धि सेवा उपलब्ध गराउने उद्देश्य भएपनि हाडजोर्नी तथा नशा सम्बन्धि सेवासहित अन्य सेवा पनि प्रदान गरिएको छ ।
‘दुई दिने शिविरमा ३०४ जनाको स्वास्थ्य परिक्षण गरिएको थियोे छ । ९ जना महिलाको पाठेघरमा रिङ राखिएको छ,’ उनले भने, ‘त्यस्तै तीन जनालाई कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा रिफर गरिएको छ ।’ शिविरबाट २१ जनाले हाडजोर्नी तथा नसा सम्बन्धि सेवा र ११५ जनाले अन्य सेवा लिएका छन् ।
स्त्रीरोग सम्बन्धि सेवा लिन आएका १६८ जना महिलामध्ये ९० जनाको पाठेघरको भीआईएसमेत परीक्षण गरिएको खोप फोकल पर्सन देवकोटाले बताए ।
