जुम्ला—कर्णाली प्रदेशभर साढे दुई वर्षमा ३९ जना मातृ मृत्यु भएको पाइएको छ । कर्णाली प्रदेश सामाजिक विकास मन्त्रालयका अनुसार आर्थिक वर्ष २०७८/०७९ मा मातृ मृत्यु संख्या १७ जना रहेको थियो ।
आर्थिक वर्ष २०७९/०८० मा १६ जना रहेको छ । २०८० पुससम्म ६ जना आमाको मृत्यु भएको तथ्यांकमा देखिन्छ ।
त्यस्तै, कम तौल भएका दुई वर्षमुनिका बालबालिकाको संख्या आर्थिक वर्ष २०७८/०७९ मा ४.१ रहेको थियो । आर्थिक वर्ष २०७९/०८० मा ३.६ रहेको विवरण सार्वजनिक गरिएको छ । आर्थिक वर्ष २०८०/०८१ को पुस मसान्तसम्म २.७ प्रतिशत बालबालिका कम तौल भएका पाइएका छन् ।
नवजात शिशुको मृत्यु संख्या आर्थिक वर्ष २०७८/०७९ मा दुई जना रहेको थियो । आर्थिक वर्ष २०७९/०८० मा शून्यमा झरेको तथ्यांकमा देखाएको छ । त्यस्तै, आर्थिक वर्ष २०८०/०८१ को पुस मसान्तसम्म ६ जनाको मृत्यु भएको सामाजिक विकास मन्त्रालयका सचिव दीर्घबहादुर पोखरेलले बताए ।
पाँच वर्षमुनिको मृत्यु संख्या आर्थिक वर्ष २०७८/०७९ मा १० जना, आर्थिक वर्ष २०७९/०८० मा आठ जना र २०८०/०८१ मा पुस मसान्तसम्म जम्मा १० जनाको मृत्यु भएको तथ्यांक सार्वजनिक भएको छ । कर्णालीमा मातृ मृत्यु र शिशु मृत्युको कारणमा कम उमेरमा विवाह र गर्भधारण, कुपोषणलगायतका समस्या कारकका रुपमा रहँदैं आएका छन् ।
