जुम्ला— खाद्यान्न अभाव, अशिक्षा, गरिबी तथा असल खानपानको अभ्यास नभएकै कारण कर्णालीमा कुपोषणको दर बढ्दो छ । सरकारले वि.सं. २०८६ सम्म नेपाललाई पूर्ण पोषणयुक्त मुलुक बनाउने लक्ष्यका साथ बहुक्षेत्रीय पोषण कार्यक्रम लागु गरेको छ ।
यद्यपि उक्त कार्यक्रम उत्पादनमुखी नभई वितरणमुखीमात्रै छ । नेपाल जनसांख्यिक स्वास्थ्य सर्वेक्षण (एनडीएचएस) को २०२२ को तथ्यांकअनुसार कर्णालीमा पुडकोपन ३६ प्रतिशत, ख्याउटेपन चार प्रतिशत, कम तौल भएका बच्चा कर्णालीमा १८ प्रतिशत रहेका छन् ।
त्यस्तै, पाँच वर्षमुनिका बालबालिकामा रक्तअल्पता हुने दर ४० प्रतिशत, १५ देखि ४९ उमेर समूहका महिलाको रक्तअल्पता दर २१ प्रतिशत रहेको छ । खाद्यान्न अभाव, बजारमा प्राप्त कम पोषणयुक्त खानाको प्रयोगले कुपोषण बढ्ने गरेको छ ।
कर्णालीलाई कृषिमा आत्मनिर्भर बनाउन ठोस नीति निर्माण र कार्यान्वयनमा प्रदेश र स्थानीय सरकारले विशेष ध्यान दिनुपर्ने कर्णालीवासीको सुझाव छ ।
जनस्वास्थ्य कार्यालय जुम्लाका प्रमुख कृष्ण सापकोटाले खानपानमा सुधार ल्याउन आवश्यक देखिएको बताए । ‘जंकफुडलाई निषेध गरी पोषणयुक्त खानेकुरामा ध्यान दिन आवश्यक छ,’ उनले भने, ‘कुपोषण घट्दो अवस्थामा रहेको छ ।’
