जुम्ला—जुम्लाका १० हजार बढी बालबालिकालाई दादुरा—रुबेला विरुद्धको खोप लगाइने भएको छ । १३ फागुनबाट जुम्लाका ८ वटा स्थानीय तहका १० हजार ७ जना बालबालिकालाई दादुरा—रुबेलाको खोप लगाइने भएको हो ।
जिल्लाका १५ महिनामाथि र पाँच वर्षमुनिका बालबालिकाका लागि दुई चरणमा खोप अभियान सञ्चालन गरिने जनस्वास्थ्य कार्यालय जुम्लाका प्रमुख कृष्ण सापकोटाले बताए ।
राष्ट्यि खोप कार्यक्रमअन्तर्गत आगामी सन् २०२६ सम्म नेपाललाई दादुरा—रुबेलामुक्त नेपाल घोषणा गर्ने लक्ष्यनुसार खोप अभियान सञ्चालन हुन लागेको प्रमुख सापकोटाले जानकारी दिए ।
१६० खोप केन्द्र निर्धारण, ९५ जना जनशक्ति परिचालन
खोप अभियानका लागि ९५ जना स्वास्थ्य जनशक्ति परिचालन हुने छन् । ८ पालिकामा १ सय ६० वटा खोप केन्द्र निर्धारण गरिएको छ । ‘खोप उमेर समूहका कुनै पनि बालबालिका नछुटुन भन्नका लागि तयारीलाई मजबुत बनाइएको छ,’ सापकोटाले भने, ‘दादुराको खोप अनिवार्य लगाउनुपर्छ ।’
जुम्लाका ८ पालिकामध्ये पहिलो चरणमा चन्दननाथ नगरपालिका, गुठिचौर,पातारासी र तातोपानी गाउँपालिकामा १३ देखि १८ फागुनसम्म गतेसम्म र दोस्रो चरणमा तिला, हिमा, सिंजा र कनकासुन्दरी गाउँपालिकामा १९ देखि फागुन अन्तिमसम्म खोप अभियान संचालन हुने जनस्वास्थ्य कार्यालयका सूचना अधिकारी प्रेम सुमाईले जानकारी दिए ।
१६ प्रतिशत खोपबाट बञ्चित
सरकारी तथ्यांकनुसार खोप उमेर समूहका १६ प्रतिशत बालबालिका अझै नियमित खोपबाट बन्चित रहेका छन् । हरेक ४—५ वर्षको बीचमा दादुरा रुबेलाको प्रकोप फैलिने गरेको छ । नियमित खोपबाट वञ्चित बालबालिका दादुरा—रुबेलाको बढी जोखिममा हुने गरेका छन् ।
खोप अभियानअन्तर्गत नियमित खोप पाउनबाट छुटेका बालबालिकाको पहिचान गरेर खोपसमेत लगाइने भएको छ । बच्चा नजिन्मदै भारत जाने, जिल्ला बाहिर जाने, खोप लगाउन डराउनेजस्ता समस्याले नियमित खोपबाट प्रायः बालबालिका छुट्ने गरेका छन् ।
नेपाल सरकारले सन् २०२३ मै नेपाललाई दादुरा—रुबेला निवारण गर्ने लक्ष्य लिएपनि सफल हुन सकेन् । पुनः नेपाललाई सन् २०२६ सम्म दादुरा—रुबेला निवारण गर्ने घोषणाका लागि फागुन १३ गतेदेखि देशभर खोप अभियान थालिएको छ ।
जिल्लामा बुधबार आयोजित जिल्लास्तरीय खोप समन्वय समिति तथा संचारकर्मीको अभिमुखीकरणले खोप अभियानलाई सफल बनाउनुपर्नेमा जोड दिएका छन् ।
प्रमुख जिल्ला अधिकारी जयकुमार घिमिरेले लक्ष्यनुसारका बालबालिकालाई खोपको पहुँचमा ल्याउन सबैले सहयोग गर्नुपर्ने बताए । ‘रोग लाग्न दिनुभन्दा नलाग्न दिनुनै उत्तम हुन्छ । खोप उमेर समुहका कोही बालबालिका नछुट्ने गरी खोप अभियानलाई प्रभावकारी बनाउन जरुरी छ,’ उनले भने ।
बढीभन्दा बढी बालबालिकालाई खोपको पहुँचमा पुराउन प्रचार प्रशारलाई व्यापक बनाउनु पर्नेमा अभिमुखीकरणमा सहभागीहरुले जोड दिएका छन् ।
