जुम्ला—नेकपा माओवादी केन्द्र निकट नेपाल राष्ट्रिय कर्मचारी संगठन जिल्ला कार्यसमिति जुम्लाले चन्दननाथ नगरपालिकाले हटाएका स्वास्थ्यका १० जना र अन्य दुई जना करार कर्मचारीलाई तत्काल काममा फर्काउन माग गरेको छ ।
सोमबार एक विज्ञप्ती जारी गर्दै मंसिर २३ को कार्यपालिका बैठकको निर्णयबाट हटाइएका करार कर्मचारीलाई काममा फर्काउन आग्रह गरेको संगठनका सचिव उत्तम देवकोटाले बताए ।
‘चन्दननाथ नगरपालिका कार्यपालिका जुम्लाको निर्णयानुसार माघ २० गतेका दिन करारका १२ जना कर्मचारी हटाईएको सन्दर्भमा यस नेपाल राष्ट्रिय कर्मचारी संगठनको गम्भीर ध्यानाकर्षण भएको छ,’ विज्ञप्तीमा उल्लेख छ । विभिन्न चरणमा लिएका लिखित परीक्षामा समावेश भई प्रक्रियाअनुसार करारमा नियुक्त भएका केही कर्मचारीहरु मात्र हटाउनुमा नगरपालिकाको कुचेष्टा र बद्नियत भएको उसको दाबी छ ।
संगठनले कानुन बमोजिम करारमा भर्ना गर्न मिल्ने पद (माली, स्वीपर, ड्राइभर, कार्यालय सहयोगी तथा स्वीकृत दरबन्दीमा आवश्यक प्राविधिक)मा मात्र करारमा सेवा लिन सकिने व्यवस्था भएको दावी गरेको छ ।
तर, नगरपालिका जनप्रतिनिधिले आफ्नो राजनैतिक अभिष्ट पूरा गर्न अनावश्यक भर्ना गरेको विद्यमान अवस्थामा सबै दरबन्दी लोकसेवा आयोगद्वारा पदपूर्ति गर्ने व्यवस्था कायम गर्न र तत्काल हटाइएका कर्मचारीलाई काममा फर्काउन उसले माग गरेको छ ।
