जुम्ला— जुम्लाको हिमा गाउँपालिका भित्रका धामी झाँक्रीले बिरामी हुँदा आफू कहाँ नआएर पहिले स्वास्थ्य संस्थामा उपचार गर्न जान सुझाव दिने गरेको छ ।
गाउँपालिकाको समन्वय प्लान नेपाल र पेस नेपाल जुम्लाको साझेदारीमा सञ्चालित सशक्त पालिका परियोजनाअन्तर्गत धार्मिक अगुवासँग सकारात्मक यौनिकता सम्बन्धी अभिमुखीकरण कार्यक्रममा धामी, झाँक्रीले यस्तो सुझाएका हुन् ।
समाजमा धामी, झाँक्रीलाई महिनावारी भएको बेलामा छोइछिटो छुन नदिने, महिनावारी बार्ने, सुत्केरी भएको अवस्थामा नछुने, बिरामी हुँदा अस्पताल नपठाउनेजस्ता सामाजिक हानिकारक अभ्यास गर्दै आएको एक किसिमको आरोप छ । तर, हिमा गाउँपालिका भित्रका धामी झाँक्रीले भने यस्ता सामाजिक अभ्यासलाई परिवर्तन गर्दै आएको जनाएका छन् ।
धार्मिक अगुवा धामी, झाँक्रीको कार्यक्रममा लिङ्गका आधारमा गरिने परम्परागत विभेद एवं किशोरी र महिलाहरुले सामना गर्दै आएका समस्याहरुका बारेमा पनि छलफल भएको थियो ।
कालिका देवताका धामी रत्नबहादुर शाहीले भने, ‘हामी धामी र हाम्रो देवी देवताका तर्फबाट बनाएका सामाजिक हानिकारक चलनले बालबालिका, किशोरी र महिलाको अधिकार हनन भएको छ । अब हामी परिवर्तन हुन्छौं । यी बनाएका चलनलाई परिवर्तन गर्ने छौं ।’
