जुम्ला—बिरामीको सहजताका लागि कृषि विकास बैंक जुम्लाको सहयोगमा कर्णाली स्वास्थ्य विज्ञान प्रतिष्ठान शिक्षण अस्पताल जुम्लालाई ‘वाटर वर्ड’ मेसिन जडान गरिएको छ । बैंकको सामाजिक उत्तरदायित्व कार्यक्रमअन्तर्गत प्रतिष्ठानलाई पाँच लाख रुपैयाँ लागतको चिसो, तातो र मनतातो पानी आउने मेसिन जडान गरिएको हो ।
आइतबार बैंकका कर्णाली प्रदेशका प्रादेशिक निर्देशक डा. सुरज टण्डनले प्रतिष्ठानका रजिष्ट्रार नृपेन्द्र महतलाई तातो, चिसो र मनतातो पानी आउने ‘वाटर वर्ड’ मेसिन हस्तान्तरण गरेका हुन् ।
मेसिन हिउँद र वर्षा समयको लागि उपयुक्त हुनेछ । वित्तिय साक्षरता कार्यक्रमसँगै प्रतिष्ठानलाई मेसिन हस्तान्तरण गरिएको कृषि विकास बैंक जुम्ला शाखाका प्रमुख खम्बीलाल शर्माले बताए । जुम्लामा चिसो क्रमिक बढ्दो छ ।
वृद्धवृद्धा, महिला, बालबालिकाहरु चिसोबाट बढी प्रभावित छन् । उनले भने, ‘अब अस्पताल आउने बिवरामीले चिसो, तातो पानी पिउने छन् । बढ्दो चिसो मौसमले प्रभावित विरामीहरुलाई मेसिनले राहत प्रदान गर्ने आशा छ ।’
बैंक तथा वित्तिय संस्थाले कुल नाफाको केही रकम अनिवार्य सामाजिक उत्तरदायित्वका क्षेत्रमा लगानी गर्नुपर्ने प्रावधान छ । अधिकांश बैंक वित्तिय क्षेत्रले नागरिकको वृहत्तर हितका लागि लगानी गरेको पाइदैन् ।
तर, कृषि विकास बैंकले नमुना कार्यका रुपमा सामाजिक उत्तरदायित्व कार्यक्रमअन्तर्गत प्रतिष्ठानलाई तातो, चिसो पानी आउने मेसिन हस्तान्तरण गरेको छ । बैंक र प्रतिष्ठान एक आपसमा विगत एक दशकदेखि समन्वय सहकार्य गर्दै आएका छन् ।
बढ्दो बिरामीको चाप र चिसो मौसमलाई मध्यनजर गर्दै अस्पतालमा ५ लाख रुपैयाँ बढी लगानीको एक सय लिटर क्षमताको वाटर वर्ड मेसिन हस्तान्तरण गरिएको कृषि विकास बैंक लिमिटेड कर्णाली प्रादेशिक निर्देशक सुरज टण्डनले बताए । उनकाअनुसार आगामी दिनमा बैंकले दुर्गम क्षेत्रका नागरिकको हितका लागि लगानी गर्नेछ । बैंकले विश्वसनीय छिटो छरितो सेवा प्रवाहसँगै सामाजिक उत्तरदायित्वको कार्यक्रमलाई निरन्तरता दिने दाबी गरे ।
कर्णाली स्वास्थ्य विज्ञान प्रतिष्ठानका रजिष्टार नृपेन्द्र महतले प्रतिष्ठानमा अत्यावश्यक रहेको मेसिन प्राप्तसँगै राहत भएको बताए । अन्य समयभन्दा चिसो समयका लागि अझ बढी प्रभावकारी हुनेछ ।
