जुम्ला—आफूलाई अभियन्ता भन्दैं हिडने एक जना चरित्रहत्या गरेको आरोपमा प्रहरी फन्दामा परेका छन् । तिला गाउँपालिका–३ कुडारीस्थित निर्माणाधीन १० शैय्याको अस्पतालको विषयलाई लिएर आफूलाई अभियन्ता भनेर चिनाउने तिला–४ नुवाकोटका नन्दराज उपाध्यायलाई प्रहरीले नियन्त्रणमा लिएको हो ।
उनले अस्पताल निर्माणमा चरम अनियमितता भएको, कमिसनको खेल खेलिएको, यसको प्रमुख दोषी चन्दननाथ नगरपालिकाकी उपमेयर रामदेवी खड्का र उनका श्रीमान् चन्द्र खड्काको नाम जोडेर एक भिडियो सामाजिक संजालमा सार्वजनिक गरेका थिए ।
उपाध्यायले अनर्गल प्रचार गरेको भिडियो निर्माण गरी खबर बुलेटिन टिभी नामको फेसबुक पेजबाट सार्वजनिक गरेपछि संलग्न नै नभएको खड्का निर्माण सेवा र उपमेयर खड्कासहित उनका श्रीमान् कानुनी उपचारमा लागेको पत्रकार सम्मेलनमार्फत जानकारी दिइएको हो ।
भ्याटसहित जम्मा १ करोड ७२ लाख भुक्तानी भएको निर्माणाधीन अस्पतालमा १० करोड भ्रष्टाचार गरेको भनी अनर्गल प्रचार गरिएको तिला गाउँपालिकाका अध्यक्ष मोतीलाल रोकायाले बताए ।
पत्रकार सम्मेलनमा गाउँपालिका अध्यक्ष रोकाया, निवर्तमान अध्यक्ष रतननाथ योगी, अस्पतापतालको साइड हेरिरहेका प्राविधिक धनप्रसाद चौलागाईं सबैले सामूहिक रुपमा उपाध्यायले सामाजिक संजालमा भ्रम फैलाएको बताएका छन् ।
उपमेयर खड्काले सामाजिक सञ्जालमा आफ्नो पद र परिवार जोडेर अनर्गल प्रचार गरिएकाले कानुनी उपचार खोजिएको बताइन् । ‘व्यक्तिगत रुपमा मैले न कुनै पावर प्रयोग गरेकी छु न त मेरो भनेको मानेर पालिकाले पैसा नै दिन मिल्छ,’ उनले भनिन्, ‘खड्का निर्माणको बायोटाडाको लागि ज्वाइन्ट भेन्चरमा काम गरिएको मात्रै हो । कुनै संलग्नता छैन ।’
खड्का निर्माण सेवा, उपमेयर खड्का र उनका श्रीमान चन्द्र खड्काको कुनै संलग्नता नरहेको ठेकेदार कम्पनी खानी निर्माण सेवाका जीवन रोकायाले बताए । ‘हामीले उहाँहरुको फर्मको कारोबार बढाउन मात्रै जेभी गरेका हौं,’ उनले भने, ‘उहाँहरुको कुनै संलग्नता नै छैन । अनावश्यक हल्ला फैलाइयो ।’
तराई र जुम्लामा बन्ने अस्पतालको लागत स्टेटमेन्ट एउटै राखेर ठेक्का खोल्दा ठेकेदारले काम गरेअनुसार पैसा नपाएको प्राविधिक चौलागाईंले बताए । उनले भने, ‘अस्पताल निर्माणको योजना पहिले नै अख्तियारमा परेको छ । पालिकाले बिल नबनाई भुक्तानी दिने कुरा भएन । हामीले अहिलेसम्म बिल बनाएका छैनौँ । कसरी १० करोड गयो ? त्यसैले यो विषयमा सरासर सामाजिक संजालमा हल्ला फैलाइएको हो ।’
बढेको कटिङको पैसा दिने र जग्गा विवाद मिलाउने हो भने एक वर्षमा निर्माण कार्य सम्पन्न गर्ने खानी निर्माण सेवाका जीवन रोकायाले बताए । ‘हामीले बनाउनु पर्ने दुई वटा एक तलाका भवन हुन,’ उनले भने, ‘जग्गा उपलब्ध नभएकाले ढिलासुस्ती भएको हो । मैले काम गर्ने भनेर झारेको १२ टन सरिया खिया लागेको छ । जग्गा कटिङ गरेको पैसासमेत पाएको छैनौँ ।’ भ्रम फैलाउने गरी सामाजिक संजालमा चरित्र हत्या गर्नेको विरुद्ध कानुनी उपचार खोजेर जाने निर्माण कम्पनीका रोकायाको भनाइ छ ।
तिला गाउँपालिकाका तत्कालीन अध्यक्ष रतननाथ योगीले आफ्नो कार्याकालमा १० शैय्याको अस्पातल शिलान्यास गरेको बताए । उनले भने, ‘भवन निर्माणमा कहीँ कतै पनि भ्रष्टाचार भएको छैन । त्यतिबेला त्यहाँका नागरिकले जग्गा दिने भनेर सम्झौता भएको हो । अहिले जग्गा विवाद भइरहेको छ ।’
त्यस्तै, तिला गाउँपालिकाका अध्यक्ष मोतीलाल रोकायाले अस्पताल निर्माणको काम ढिला हुनुमा जग्गाको विषय मुख्य रहेको बताए । ‘सामाजिक सञ्जालमा आएको कुरा भ्रमपूर्ण छ,’ उनले भने, ‘ठेकेदारले पालिकालाई जग्गा उपलब्ध गराइ दिनुहुन भनेर तीनपटक मसँग भेट्न मात्रै आएका थिए । तर, अहिलेसम्म जग्गाको कुरा मिलेको छैन ।’
खड्का परिवारले आफ्नो निर्माण कम्पनीको बारेमा गलत प्रचार गरी चरित्र हत्या गरेको भन्दै गाली बेइज्जती मुद्दा दायर गरेको सुमन खड्काले बताए ।
