वीरेन्द्रनगर– कर्णाली प्रदेशमा स्वास्थ्य अवस्था सुधार हुँदै गएको छ । विगतका वर्षहरूको तुलनामा सुधारोन्मुख हुँदै गएको पाइएको हो ।
बुधवार प्रदेश सरकार स्वास्थ्य सेवा निर्देशनालयद्वारा आयोजित आर्थिक वर्ष २०७९÷०८० को वार्षिक समीक्षा गोष्ठीमा कर्णालीको स्वास्थ्य क्षेत्रमा सुधार हुँदै गएको जनाइएको हो ।
यो आर्थिक वर्षमा स्वास्थ्य क्षेत्रमा सुधारको भौतिक प्रगति ७६ प्रतिशत रहेको स्वास्थ्य सेवा निर्देशक डा. रविन खड्काले बताए । अघिल्लो वर्ष ५६ प्रतिशत मात्रै रहेको थियो । उनकाअनुसार अघिल्ला वर्षहरूको तुलनामा प्रदेशमा यो वर्ष स्वास्थ्यमा केही सुधार हुँदै गएको छ । ‘कर्णालीमा जनशक्ति र उपकरणको कमी भए पनि सीमित स्रोत साधनबाट उल्लेखनीय सेवा दिन सफल भएको छ ।’ उनले भने,‘अवस्थामा सुधार भए पनि दिगो विकास लक्ष्य भेट्टाउन अझै मेहनत गर्नुपर्ने छ ।’
सुर्खेतको बराहताल, जुम्लाको तातोपानी, डोल्पाको डोल्पो बुद्ध, शे–फोक्सुण्डो, छार्कातोक्सोङ, जाजरकोटको शिवालय, जुनीचाँदे, कालीकोटको तिलागुफा पालिकामा संस्थागत सुत्केरी सेवा सञ्चालन हुने गरेको डा. खड्काले बताए ।
विगतको तुलनामा कर्णालीको स्वास्थ्य क्षेत्रमा अहिले केही सुधार आए पनि पर्याप्त नभएको प्रदेश सामाजिक विकासमन्त्री खड्कबहादुर पोखरेलले बताए । ‘सबै कर्णालीवासीले सहज स्वास्थ्य सेवा पाउने अधिकार पूर्तिका लागि स्वास्थ्य संस्था र स्वास्थ्यकर्मीहरूको उल्लेख्य भूमिका हुने भएकाले आफ्नो क्षेत्रमा अझ खटिन आवश्यक रहेको छ ।’ उनले भने,‘आगामी आर्थिक वर्षमा कमजोर पालिका र जिल्लालाई प्राथमिकतामा राख्न जरुरी रहेको छ ।’
