जुम्ला—मुगुको ताल्चा विमानस्थलमा विमान नआउदा एक रिफर बिरामीको विमानस्थलमै मृत्यु भएको छ । शनिबार छायाँनाथ रारा नगपालिका–५ ढुम गाउँका ५५ वर्षीय लोकबहादुर रोकायाको विमानस्थलमै मृत्यु भएको हो ।
केही दिनअघि उनी लडेर घाँटीमा गम्भीर चोट लागेपछि जिल्ला अस्पतालमा भर्ना भएका थिए । अस्पतालले उपचार गर्न नसकेर शुक्रबार नेपालगञ्ज रिफर गरेपछि एयरपोर्ट पु¥याएका रोकायाको जहाज कुर्दाकुर्दै मृत्यु भएको हो ।
जहाज नआउँदा रोकायाको एयरपोर्टमै मृत्यु भएको रारा विमानस्थल प्रमुख रोमन भट्टराईले बताए । ताल्चा रारा विमानस्थलमा नेपालगञ्जदेखि जहाज उडान कम हुन थालेपछि बिरामीको अकालमा ज्यान जान थालेको छ ।
रोकायाको घाँटीको घाउ जटिल देखिएको अस्पतालमा उपचार असम्भव देखिएपछि नेपालगञ्ज रिफर गर्नुपर्ने अवस्था आएको जिल्ला स्वास्थ्य प्रमुख उमेश गौतमले बताए । जहाजको समस्याले उनको एयरपोर्टमा ज्यान गएको गौतमको भनाइ छ ।
पहिले एक दिनमा चार-पाँच फ्लाइट उडान हुने रारा विमानस्थलमा दसैं तिहारको समयमा कम जहाँज आउने कारणले बिरामी, सर्बसाधारले तल झर्ने यात्रुले सास्ती भोग्दै आएका छन् । यतिबेला दशै तिहार मानेर सुर्खेत, नेपालगन्ज काठमाडौं फर्किने विद्यार्थी र अन्य सर्वसाधारण विमानस्थलमा चाप बढेको छ ।
गत असोज अन्तिम साता आएको अविरल वर्षाका कारण कर्णाली राजमार्गमा पनि पुर्ण रुपमा सुचारु हुन नसक्नु र रारा विमानस्थलामा जहाज पनि समयमै नआउने कमै फ्लाइट आउने भएकाले मुगुका बिरामीले अकालमै ज्यान गुमाउनु परेको र सर्वसाधारणले सास्ती खेप्नु परेको हो ।
