जुम्ला—चन्दननाथ नगरपालिका–३ बुढ्थापावाडाका एकै घरका चार जना कोभिड–१९ संक्रमित छन् । उनीहरु अहिले होम आइसोलेसनमा बसिरहेका छन् । उनीहरुले कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा असार १५, १६ र १७ गते पिसिआर परीक्षण गर्दा कोभिड–१९ संक्रमण पुष्टि भएको हो ।
संक्रमित देवीजंग बुढथापाको घरका पाँच जना परिवारमध्ये चार जनामा कोभिड–१९ संक्रमण पुष्टि भएको छ । ‘बच्चाको परीक्षण गरिएको छैन्,’ उनले भने एकसातादेखि होम आइसोलेसनमै छौं । घर बाहिर निस्कने अवस्था छैन । संक्रमणका केही लक्षण पनि छन् । औषधी ल्याइदिने मान्छे छैन । अहिले हामी निकै पीडामा छौं ।’
बुढथापाकाअनुसार वडाध्यक्षले व्यक्तिगत रुपमा केही माक्स र स्यानिटाइजर दिएका छन् । तर, नगरपालिका, वडापालिकाले वेवास्था गरेको गुनासो उनले सुनाए ।
चन्दननाथ नगरपालिकाले उद्योग वाणिज्य संघ जुम्लाको हलमा संस्थागत आइसोलेसन बनाइएको छ । नगरपालिकाभित्रका सबै संक्रमतिलाई संस्थागत आइसोलेसनमा बस्न आग्रह गरेपनि नागरिकले बस्न नमानेपछि गाउँमा संक्रमण फैलिएको स्थानीयहरु बताउँछन् ।
चन्दननाथ नगरपालिका स्वास्थ्य संयोजक पृथ्वीनाथ योगीकाअनुसार संक्रमण परीक्षण गरेपछि लक्षण जटिल देखिएपछि कोभिड–१९ अस्पतालमा भर्ना हुने हो । सामान्य लक्षण भएका व्यक्तिहरु होम आइसोलेसनमै बस्ने हो ।
उनले भने, ‘अहिले आर्थिक वर्षको अन्त्यतिर भएकोले पनि नगरपालिकामा बजेटको कमी नै छ । यसअघि संक्रमितलाई कोसेली वितरण कार्यक्रम थियो,’ उनले भने, ‘अहिले बजेट अभावले त्यो कार्यक्रम पनि प्रभावित भएको छ । अब नयाँ आर्थिक वर्षमा कोभिड–१९ संक्रमण रोकथामका लागि बजेट व्यवस्थापन हुन्छ होला ।’
