जुम्ला—आयुर्वेद कार्यालय जुम्लाका प्रमुखले महिला कर्मचारीमाथि अभद्र यवहार गरेको भन्दै सबै कर्मचारीहरु कारवाहीको माग गर्दै जिल्ला प्रशासन कार्यालयमा उजुरी हालेका छन् ।
जिल्ला जनस्वास्थ्य सेवा कार्यालयको आयुर्वेद शाखाका प्रमुख देवेन्द्र ठाकुरले कार्यालयमा जथभावी धम्की तथा गाली गर्नेदेखि विभिन्न प्रकारका अभद्र व्यवहार गरेको भन्दै कारवाहीको माग गर्दै ९ जना कर्मचारी निवेदनसहित प्रशासन पुगेका हुन् ।
प्रमुख जिल्ला अधिकारीलाई संयुक्त उजुरी लेख्दैं उनीहरुले आयुर्वेद शाखा चन्दननाथ नगरपालिका–१० का प्रमुख देवेन्द्र ठाकुरले सबै कर्मचारी माथि अभद्र व्यवहारलगायत पटक–पटक मानसिक यातना दिने गरेको उल्लेख गरेका छन् ।
कर्मचारीले कार्यालय प्रमुखले घरयासी कामकाजमा समेत लगाउने गरेको आरोप पनि उनीहरुको छ । यस्तो अवस्थामा काम गर्न नसकिने अवस्था भएको भन्दै उनीहरुले ठाकुरमाथि कारवाहीको माग गरेका छन् । निवेदनमा आयुर्वेदका प्रमुख ठाकुरको व्यवहार जिल्ला जनस्वास्थ्य प्रमुख कृष्ण सापकोटालाई सोध्न समेत भनिएको छ ।
प्रमुख ठाकुरले कार्यालयमा हातपात नै गर्न खोजेपछि उनका विरुद्ध सबै कर्मचारी आन्दोलित भएर कारवाहीका लागि जिल्ला प्रशासन कार्यालयमा निवेदन दिएका हुन् । आयूर्वेद शाखाका कर्मचारीहरु सुमित्रा आचार्य, छाया उपाध्याय, डा. प्रतिभा शर्मा, रञ्जना रावत, गोर्ख बुढा, कमल बुढा, पार्वती रावल, मानबहादुर रोकाया, कर्णबहादुर बुढाले संयुक्त हस्ताक्षर गरी कारवाहीको माग गरेका छन् ।
कोभिड–१९ को संकटको समयमा आफू पनि काम नगर्ने जिम्मेवारी नदिई काम समेत हुन नसकेको कर्मचारी बताउँछन् । प्रमुख ठाकुरले कर्मचारीलाई काम गर्ने वातावरण नबनाएका कारण १८ लाख रुपैयाँ बजेट कामै नभएर फ्रिज जाने भएको कर्मचारीले जानकारी दिएका छन् । जिल्ला जनस्वास्वाथ्य कार्यालय प्रमुख कृष्ण सापकोटाका अनुसार पहिले देखिनै कर्मचारीहरुबाट शाखा प्रमुखले धम्काउने गरेको गुनासो आइरहन्थ्यो । तर, १३ असारमा के भएको हो भन्ने आफूलाई थाहा नभएको उनले बताए ।
‘हामी विहान कार्यालयमा गएका थियौं । तिमीहरु घर गइहाल भनेर धम्की दिएपछि हामी उनलाई कारवाही र सुरक्षाको माग गर्दै प्रशासनमा आएका हौं,’ कर्मचारी सुमित्रा आचार्यले भनिन् । कार्यालयमा जाँदा महिलाहरुले कार्यालयमा काम गर्ने होइन्, घरमा काम गर्ने हो भन्दै धम्की दिएको अर्को एक कर्मचारीले बताए ।
सहायक प्रमुख जिल्ला अधिकारी नन्दराम चौलागाईले आयुर्वेद शाखाका कर्मचारी र प्रमुखबीच पटक–पटक विवाद हुने गरेको पाइएको बताए । दुवै पक्षलाई छलफल राखी सबैका गल्ती कमीकमजोरी सुधार गर्ने र आगामी दिन यस्तो कार्य नगर्ने र पुनः यस्तो कार्य गरिएको खण्डमा विभागीए कारवाही हुने भनेर मिलापत्र गरिएको उनले बताए ।
