जुम्ला—लकडाउन अवधिभर जुम्लामा ११ हजार १७ जना नागरिक भित्रिए । जिल्ला प्रशासन कार्यालय जुम्लाको तथ्यांकअनुसार मंगलबारसम्म जिल्लामा भित्रिएका नागरिकमध्ये एक हजार १ सय १४ जना १४ दिनसम्म क्वारेन्टाइनमा बसेको छन् ।
क्वारेन्टाइनमा बसेकामध्ये १ हजार १ सय १० जना १४ दिनपछि क्वारेन्टाइनबाट घर फिर्ता भएका छन् । जुम्लाको एक नगरपालिका र सात गाउँपालिकाले निर्माण गरेका ५ सय २१ बेडको क्वारेन्टाइनमा अझै १ सय १४ जना छन् । ५ सय १६ जना अहिले पनि होम क्वारेन्टाइनमा छन् ।
जुम्लामा भित्रिएका नागरिक मध्येबाट एकैदिन ८ सय ४७ जनाको स्वाब संकलन गरी आरटी पिसिआर परीक्षण गर्दा सबै जनाको रिपोर्ट नेगेटिभ आएको कर्णाली स्वास्थ्य विज्ञान प्रतिष्ठान शिक्षण अस्पताल जुम्ला अस्पताल निर्देशक डा. मंगल रावलले बताए । यसअघि प्रतिष्ठान जुम्लामा आरटी पिसिआर उपकरण संचालनमा ल्याएदेखि ७६ जनाको परीक्षण गर्दा पनि रिपोर्ट नेगेटिभ नै आएको थियो ।
यहाँ आरटी पिसिआर उपकरण सञ्चालन नहुँदै जुम्लाबाट स्वाब संकलन गरी सुर्खेत र काठमाडौंमा ३ सय ३९ जनाको आरटी पिसिआर परीक्षण गर्दा पनि रिपोर्ट नेगेटिभ नै आएको थियो ।
अहिलेसम्म जुम्लामा एक हजार २ सय ६२ जनाको स्वाब संकलन गरी आरटी पिसिआर परीक्षण गर्दा सबैजनाको रिपोर्ट नेगेटिभ आएको प्रमुख जिल्ला अधिकारी दुर्गा बञ्जाडेले बताइन् । कोरोना भाइरस रोकथाम तथा नियन्त्रण गर्नका लागि जुम्लाले दुई महिनाअघि देखि नै घनिभूत काम गरेकाले अहिले यसको नजिता सकारात्मक देखिएको उनले बताइन् ।
क्वारेन्टाइनमा १४ दिन बसेर घर फर्केनेहरुमध्ये कोरोना जोखिम भएका जिल्ला र देशबाट आएकामा नमुनाका रुपमा ¥यापिट डाइगोनोस्टिक टेष्ट गरेर रिपोर्ट नेगेटिभ आएपछि घर फर्काएको जनस्वास्थ्य प्रमुख कृष्णप्रसाद सापकोटाले बताए । उनले भने, ‘किट अभावका कारण अन्य व्यक्तिहरु सामान्य स्वास्थ्य परीक्षण गरी घर पठाएको हो ।’ यहाँ भित्रिएकामध्ये २ सय ६१ जनाको आडिटी कोरोना परीक्षण गरिएकोमा सबै जनाको रिपोर्ट नेगेटिभ आएको जनस्वास्थ्य प्रमुख सापकोटाले बताए ।
