वीरेन्द्रनगर—कोरोना भाइसरको त्रास व्यापक रुपमा फैलिदैं गर्दा कर्णालीका सीमा नाकामा कोरोना भाइरस जाँचका लागि हेल्प डेस्क राखिने भएको छ । कर्णाली प्रदेश सरकारको मन्त्रिस्तरीय निर्णयअनुसार कर्णालीका सीमा नाकामा उपकरण र औषधिसहित चिकित्सकको टोली राख्ने निर्णय भएको हो ।
कर्णाली प्रदेश सरकारले चीनसँग सीमा जोडिएका हुम्लाको हिल्सा हेल्प डेस्क राख्ने छ । यस्तै, सल्यानको कपुरकोट, सुर्खेतको बबई र सुर्खेत विमानस्थलमा हेल्पडेस्क राख्ने निर्णय प्रदेश सरकारले गरेको हो ।
मन्त्रिस्तरीय निर्णयका आधारमा कर्णालीका सीमा नाकामा स्वास्थ्य हेल्प डेस्क राख्न लागिएको कर्णाली प्रदेश सरकारका सामाजिक विकास मन्त्रालय अन्तर्गतको स्वास्थ्य सेवा निर्देशनालयका निर्देशक रिता भण्डारी जोशीले जानकारी दिइन् ।
‘कर्णालीका सीमा नाकामा स्वास्थ्य जाँच चौकी तत्काल राखिने छ,’ उनले भनिन्, ‘तीन दिनभित्र औषधि उपकरणसहित स्वास्थ्य जाँच केन्द्र राखिनेछ ।’
