सुर्खेत—पहाडी जिल्लाका रुपमा रहेको जाजरकोटमा समेत मानसिक स्वास्थ्य समस्या बढ्दै गएको पाइएको छ । पुरुषको तुलनामा महिलालाई मानसिक स्वास्थ्य बढी देखिएको स्वास्थ्य एक स्वास्थ्य शिविरका आएका बिरामीको अवस्थाले देखाएको छ ।
मानसिक स्वास्थ्य तथा परामर्श केन्द्र–नेपाल (सीएमसी)ले स्थानीय तहसँगको आर्थिक सहयोगमा संचालन गरेको मानसिक स्वास्थ्य शिविरमा जम्मा १ सय २७ जना मानसिक स्वास्थ्य समस्यामा परेका व्यक्तिहरुले सेवा पाएका छन् ।
मानसिक रोग विशेषज्ञ डा. सुशील समदर्शीकाअनुसार सेवा लिन आएकामध्ये सबैभन्दा बढी ३८ जना डिप्रेसन, २८ जनामा छारे रोग, २७ जनामा चिन्ताजन्य समस्या, १५ जनामा कडा खालको मानसिक समस्या र बाँकी १० जनामा विकृत तनावको र अन्य खालका मानसिक स्वास्थ्य समस्या रहेको डा. समदर्शीले बताए । उक्त शिविरबाट १५ जना विकृत तनाव, डिप्रेशन तथा चिन्ताजन्य समस्या भएका ब्यक्तिहरुले मनो परामर्श सेवा पाएका छन् ।
भेरी तथा नलगाड नगरपालिकामा बिहिबार र शुक्रबार संचालन गरिएको उक्त शिविरमा मानसिक स्वास्थ्य समस्या भएका बिरामीहरुले उपचार तथा मनोपरामर्श सेवा प्रदान गरिएको सी.एम.सी–नेपालका मानसिक स्वास्थ्य सामाजिक कार्यकर्ता कालीबहादुर कामीले जानकारी दिए ।
गरिवी, बेरोजगारी, अत्यन्त महत्वाकांक्षी स्वभाव, वैदेशिक रोजगारी, मोवाइल एवं प्रविधीको दुरुपयोगलगायतका कारणले गर्दा अचेल मानसिक स्वास्थ्य तथा मनोसामाजिक समस्याका व्यक्तिहरु निकै बढ्ने गरेको विज्ञहरुको दावी छ । यद्यपी यस सम्बन्धी उपचारको बारेमा थाहा नहुँदा पनि व्यक्तिहरुले असहज जीवन बिताउन बाध्य छन् ।
