पोखरा— गण्डकीका सामाजिक तथा स्वास्थ्यमन्त्री विन्दुकुमार थापाले धौलागिरी अस्पतालको स्तरोन्नती गर्दै दक्ष चिकित्सकद्वारा उपचार सेवा प्रवाह गर्ने योजना अगाडि बढाइएको बताएका छन् । बुधबार पूर्ण खोपयुक्त बाग्लुङ जिल्ला घोषणा कार्यक्रममा बोल्दै उनले धौलागिरी अस्पताललाई १०० शैय्यामा स्तरोन्नतीका लागि ३५ रोपनी जग्गा आवश्यक रहेको बताए ।
‘धौलागिरी अस्पतालको स्तरोन्नती गर्दै दक्ष चिकित्सकद्वारा उपचार सेवा प्रवाह गर्ने प्रयास स्वरुप ५० शैय्या स्वीकृत भइसकेको र १०० शैय्या स्वीकृतिका लागि जग्गा मुख्य आवश्यकता छ,’ मन्त्री थापाले, ‘१०० शैयाको अस्पताल स्वीकृतिका लागि ३५ रोपनी जग्गा आवश्यक हुने भएकाले जग्गा व्यवस्थापन गर्न आग्रह गर्दछु ।’ आव २०८१÷८२ का लागि धौलागिरी अस्पतालका लागि मात्र ५ करोड ३१ लाख ६८ हजार रुपैयाँ विनियोजन गरिएको उनले उल्लेख गरे ।
कार्यक्रममा बागलुङलाई पूर्ण खोप सुनिश्चितता तथा दिगोपना जिल्ला घोषणा गरिएको छ । गण्डकीका सामाजिक तथा स्वास्थ्यमन्त्री थापाले जिल्लालाई पूर्ण खोप सुनिश्चिता तथा दिगोपना घोषणा गरेका हुन् ।
यस्तै, जिल्लाका १० वटै पालिकालाई पूर्ण खोप सुनिश्चिता पालिका घोषणा पश्चात् तनहुँलाई पनि पूर्ण खोप सुनिश्चित जिल्ला घोषणा गरिएको छ । १६ महिनादेखि ५९ महिनासम्मका सम्पूर्ण बालबालिकालाई राष्ट्रिय खोप कार्यक्रमको तालिकाअनुसार १५ महिनाभित्र पाउनुपर्ने सबै खोप लगाइसकेको सुनिश्चिततासहित मंगलबार एक कार्यक्रम आयोजना गरी पूर्ण खोप जिल्ला घोषणा गरिएको थियो ।
यसअघि असार महिनामा नै मनाङलाई पूर्ण खोप सुनिश्चित जिल्ला घोषणा गरिएको थियो । पर्वत जिल्लालाई २०७५ जेठ ३१ गते पूर्ण खोपयुक्त जिल्ला घोषणा गरिएकोमा २०८१ असार ५ गते पूर्ण खोप सुनिश्चितता तथा दिगोपना घोषणा गरिएको छ ।
स्याङ्जाका १४ हजार ८८ बालबालिकालाई पूर्ण खोप लगाएसँगै स्याङ्जा पूर्ण सुनिश्चितताको घोषणा गरिएको छ । जन्मेदेखि १५ महिनाका ३ हजार ४ सय ५७ जना र १६ देखि ५९ महिनाका १० हजार ६ सय ३१ जना बालबालिकाले पूर्ण खोप लगाइएपश्चात सुनिश्चित घोषणा गरिएको हो ।
१६ देखि ५९ महिनासम्मका कुल ५ हजार २ सय ८७ जनाले राष्ट्रिय खोप तालिकाअनुसार खोप पाइसकेको निश्चित गरी पूर्ण खोप सुनिश्चित जिल्ला घोषणा गरिएको स्वास्थ्य कार्यालय पर्वतले जनाएको छ ।
म्याग्दीलाई २०७१ चैतमा पूर्ण खोप सुनिश्चित तथा दिगोपना जिल्ला घोषणा भएको थियो । नेपालको छैटौं र गण्डकीको पहिलो खोप सुनिश्चित तथा दिगोपना घोषणा भएको जिल्ला म्याग्दी रहेको थियो । कास्कीलाई असार २० गते बिहीबार पूर्ण खोप सुनिश्चित तथा दिगोपना घोषणा गर्ने बताइएको छ ।
