पोखरा—गोरखा अस्पतालमा शल्यक्रिया गरेर गोरखा—३ नरकेश्वरका ५७ वर्षीय एक पुरुषको मलद्वारमा अड्केको बोतल निकालिएको छ । आइतबार तीन घण्टा लामो शल्यक्रिया गरेर मलद्वरामा अडकिएको बोतल निकालिएको अस्पतालमा निमित्त मेडिकल सुपरिटेडेन्ट डा. सिद्धार्थ खनालले जानकारी दिए ।
ती पुरुषको मलट्ठारमा बोतल अड्किएर पेटमा संक्रमण फैलिएपछि सिरियस भएर अस्पताल आएका थिए । करिब १ महिनादेखि उनको मलद्वारमा बोतल अड्केको थियो ।
बोतल अड्किएर ठूलो आन्द्रा अवरुद्ध भएको अवस्थामा उनी आइतबार बिहान १० बजे अस्पतालको इमर्जेन्सीमा आएको डा. खनालले बताए ।
एक्स—रे गर्दा मलद्वारमा बोतल देखिएपछि अस्पतालका सर्जनद्वय डा. जितेन्द्रकुमार सिंह र डा. विश्वराज खड्का, एनेस्थेसियोलोजिस्ट डा. शम्भु अधिकारीलगायतको टिमले १० सेमी लामो र ७.५ सेमी चौडाइ भएको बोतल निकालेका हुन् ।
शल्यक्रिया पश्चात् बिरामीको होस आइसकेको र हाल बिरामीलाई आईसीयुमा राखेर उपचार भइरहको छ । आईसीयुमा औषधि दिइरहनुपरेकाले डिस्चार्जबारे एकिन नभएको डा. खनालले बताए ।
ती पुरुषको मलद्वारमा कसरी बट्टा अड्कियो भन्नेबारे बिरामी निको भएपछि जानकारी लिइने डा. खनालले बताए ।
