पोखरा—तत्कालीन लायन्स सामुदायिक अस्पताललाई आफू मातहत ल्याएर प्रदेशमै पहिलो संक्रामक तथा सरुवा रोग अस्पताल शिशुवा स्थापना गरेको गण्डकी प्रदेश सरकारले लमजुङ जिल्ला अस्पताल पनि आफू मातहत ल्याएको छ । बिहीबार गण्डकी प्रदेश सरकारका स्वास्थ्य तथा जनसंख्यामन्त्री मधु अधिकारी गुरुङको रोहबरमा अस्पताल हस्तान्तरण गरिएको हो ।
स्वास्थ्य तथा जनसंख्या मन्त्रालयका सचिव डा. विश्वबन्धु बगाले र एचसिडिएचका निर्देशक कपिल शर्माले जिल्ला अस्पताल हस्तान्तरण पत्रमा हस्ताक्षर गरे । वि.सं. ०५८ साल साउनदेखि सो अस्पताल गैरसरकारी संस्था एचसिडिएचले सञ्चालन गरिरहेको अस्पताल प्रशासन प्रमुख हेमन्त श्रेष्ठले बताए ।
गण्डकी प्रदेश सरकारका स्वास्थ्य तथा जनसंख्यामन्त्री मधु अधिकारी गुरुङले अस्पतालको सेवा तथा व्यवस्थापनबारे आफ्नो चासो र चिन्ता भएको बताइन् । स्वास्थ्य तथा जनसंख्या सचिव डा. बगालेले सेवा गर्न इच्छाशक्ति चाहिने भन्दै अस्पतालको क्षमता विस्तारमा समुदाय तथा स्थानीय सरकारको भूमिका महत्वपूर्ण हुने बताए ।
बेशीसहर नगरपालिकाका मेयर गुमानसिंह अर्यालले आफू वि.सं. ०४३ सालदेखि अस्पताल नजिकबाट हेरेको स्मरण गर्दै विशेषज्ञसहित १४ जना डाक्टरले दिएको सेवा आगामी दिनमा प्रभावकारिताबारे चिन्ता व्यक्त गरे । अस्पतालमा १४ डाक्टरसहित १ सय २२ जना कार्यरत छन् ।
एचसिडिएचका निर्देशक कपिल शर्माले सरकारले गैससको अस्पताल भन्ने र गैससले सरकारको हो, हामीले एक दिन छाडेर जानैपर्छ भन्ने सोचाइले अपेक्षित उपलब्धि हासिल गर्न नसकेको सुनाए ।
जिल्ला अस्पताल लमजुङका प्रशासन प्रमुख हेमन्त श्रेष्ठका अनुसार २१ वर्षसम्म पब्लिक प्राइभेट पार्टनरसीप मोडलमा सञ्चालन आइरहेको अस्पताल अहिलेमात्रै पूर्णरुपमा प्रदेश सरकारको मातहत आएको हो । श्रेष्ठका अनुसार हाल भइरहेको सबै दायित्व अब प्रदेश सरकारको भएको छ ।
गण्डकी प्रदेश सरकारले यसअघि पोखरा १६ को मातृशिशु अस्पताल तथा जिल्ला अस्पताल मध्यबिन्दुलाई आफू मातहत ल्याएको थियो ।
