पोखरा—मध्यविन्दु जिल्ला अस्पतालमा नयाँ मेडिकल सुपरिटेन्डेन्टका रुपमा डा. जितेन्द्र कँडेल पुगेका छन् । म्याग्दीको बेनी अस्पतालमा मेसु रहेका उनी आइतबारदेखि मध्यविन्दु जिल्ला अस्पतालमा हाजिर भएका हुन् ।
डा. कँडेलको कामबाट अस्पतालले फड्को मार्ने विश्वास गरिएको छ । अस्पतालका सूचना अधिकारी छविलाल सुवेदी डा. जितेन्द्र मेसुका रुपमा आएकाले अब सबै काम सहज हुने र ५० शैय्याको अस्पतालको रुपमा सबै सेवा विस्तार गर्ने काम हुने विश्वास व्यक्त गरे ।
‘उहाँ गत वर्ष संघीय सरकारले उत्कृष्ट कर्मचारीका रुपमा १ लाख राशीको पुरस्कारबाट पुरस्कृत व्यक्ति हुनुहुन्छ । बेनी अस्पताल पनि प्रदेशमा उत्कृष्ट नै छ । अब मध्यविन्दुको पनि सुधार अवश्य होला,’ उनले भने ।
मध्यविन्दुको मेसु भएलगत्तै डा. कँडेलले अस्पतालको अवस्था र तत्काल गर्नुपर्ने कामबारे अस्पताल व्यवस्थापन समिति तथा कर्मचारीहरुसँग छलफल गरेका छन् । ‘मौखिक रुपमा ५० शैय्याको भने पनि आधिकारिक रुपमा कुनै कागजात फेला परेन । ५० शैय्याको अस्पतालले दिनुपर्ने पूर्ण सेवा दिन कठिनाइ रहेको छ,’ डा. जितेन्द्रले भने, ‘५० शैय्याको अस्पतालमा छुट्टाछुट्टै विभाग हुनुपर्नेमा त्यस्तो छैन । यिनै कुराहरुलाई पहिलो चरणमा समाधान गर्ने गरी काम गर्छु ।’
लमजुङ र मध्यविन्दु अस्पताललाई ५० शैय्या बनाउने भनिएको थियो । डा. कँडेलकाअनुसार मध्यविन्दुमा ५० शैय्या सम्बन्धी कागजात नभेटेकाले अस्पतालले आधिकारिक पत्र माग गर्दै तत्काल पत्राचार गर्नेछ ।
डा. कँडेलले आफ्नै जिल्लाको अस्पताल मध्यविन्दुलाई उत्कृष्ट बनाउन थप पहल गर्ने प्रतिबद्धता जनाए । ‘अहिले नै के के गर्ने भन्ने पूर्ण तयारी गर्ने समय त भएको छैन । कर्मचारी व्यवस्थापन र छुट्टाछुट्टै विभाग बनाएर सेवा दिने पहिलो प्राथमिकताका विषय हुन्,’ उनले भने ।
