पोखरा–मध्यविन्दु जिल्ला अस्पताल १५ शैय्याबाट ५० शैयामा स्तरोन्नती भएपनि सोहीअनुसार दरबन्दीका स्वास्थ्यकर्मी छैनन् । वि.सं. २०७५ फागुनमा १५ शैय्याको जिल्लास्तरीय अस्पताल गत वर्ष ५० शैय्यामा स्तरोन्नती हुने घोषणा भएपनि आवश्यक डाक्टर तथा कर्मचारी व्यवस्थापन हुन सकेको छैन ।
यतिबेला यसअघिका मेडिकल सुपरिटेन्डेन्ट सर्जन डा. बीरबहादुर थापा समायोजनमार्फत वीर अस्पताल गएपछि मेसुको पदसमेत रिक्त भएको अस्पतालका सूचना अधिकारी छविलाल सुवेदीले जानकारी दिए । ‘अहिले त अस्पताल व्यवस्थापन समितिसमेत पदपूर्ति भएको छ, हामीले कि मेसु देऊ कि अख्तियारी देऊ भनेका छौं,’ उनले भने, ‘मेसु नहुँदा औषधी खरिद, तलबभत्ताका लागि नयाँ निर्णयलगायत काममा बाधा पुगेको छ ।’
गत साउनमा मेसु डा. थापा वीर अस्पताल गएपछि अस्पताल साउनमै मेसुविहीन भएको हो । उक्त कुराको जानकारी त्यतिबेलै दिएको भएपनि १०÷१२ दिन अघि समितिले तालुक निकायमा पत्राचार गरेको छ । डा. थापाको समायोजन हुने कुरा स्थानीय चुनावअघि नै जानकारी थियो । चुनाव, आर्थिक वर्षको अन्त्यलगायत कारणले डा. थापा साउन २० सम्म मध्यबिन्दुमै रहेका थिए । मेसु व्यवस्थापन पश्चात् जाने थापाले बताएपनि सरकारी बेवास्ताले मेसु रिक्त भएको अस्पतालको दाबी छ ।
सरकारी दरबन्दीका डाक्टरविहीन मध्यविन्दु
सरकारले दिनुपर्ने डाक्टर, स्वास्थ्यकर्मी तथा कर्मचारी व्यवस्थापनमा चासो नदिएको अस्पताल स्रोतको दाबी छ । तर, अस्पतालले आफ्नै तरिकाले सेवा विस्तार गरेको छ । अस्पतालमा डाक्टरको ३ दरबन्दी छन् तर दरबन्दीका डाक्टर १ जना पनि छैनन् ।
तत्कालीन मेसु डा. थापा समायोजनमा गएपश्चात् करिब १ महिनादेखि उक्त पद रिक्त छ । अन्य २ डाक्टरमध्ये १ जना सरुवा र अर्का १ जना अध्ययन बिदामा विदेश गएपछि अस्पताल सरकारी दरबन्दीका डाक्टरविहीन हुन पुगेको हो ।
६ जना नर्सिङ स्टाफमध्ये अस्पतालमा २ जनामात्रै कार्यरत छन् । ४ दरबन्दी रिक्त छन् । प्रशासनिक कर्मचारीतर्फ १ जना नायब सुब्बा र १ जना खरिदारको पद रहेकोमा पद रिक्त छन् । लेखाको दरबन्दी नै नहुँदा आन्तरिक राजस्वका कर्मचारीले जिम्मेवारी सम्हालिरहेका छन् ।
एनेस्थेसिस्ट १, ल्याब टेक्निसियन १ र अहेब १ जनाको पनि दरबन्दी रिक्त नै छ । आन्तरिक स्रोतका ४७ कर्मचारी र ग्रामीण फाउन्डेसन नामक संस्थामार्फत् ६ जनाले तलबभत्ता खाने गरेका छन् ।
अस्पतालमा अहिले छात्रवृत्तिका १० जना, समितिले नियुक्ति दिएका ३ जना र प्रदेशमार्फत प्राप्त अस्थायी १ जना गरी १४ जना डाक्टर कार्यरत छन् । अस्थायी करारमा १ जना दिएको मेडिकल अधिकृत पदमा सर्जन डाक्टर नियुक्त भएपछि सर्जरी सेवा सुरु भएको छ ।
तत्कालीन मेसु डा. थापाले नै सर्जरी सेवा दिइरहेको भएपनि डाक्टर थापा नै बिरामी परेपछि करिब ५ महिना सेवा अवरुद्ध भएको थियो । अस्पतालले हर्निया, पाल्यस, एपेन्डिक्स, शल्यक्रियाबाट सुत्केरी गराउनेलगायत सेवा सञ्चालनमा ल्याएको थियो ।
अस्पतालमा दैनिक २ सय हाराहारीमा ओपिडी बिरामी आउने गरेको अस्पतालले जनाएको छ । अस्पतालले स्वास्थ्य बिमा कार्यक्रमसमेत सञ्चालन गरेको छ । अस्पताल आउने बिरामीमध्ये करिब ६० प्रतिशत बिरामी बिमित रहेको अस्पतालका सूचना अधिकारी सुवेदी बताए । उनका अनुसार सवा करोड रुपैयाँ बिमाबापत्का शोधभर्ना हुन बाँकी हुँदा खर्च व्यवस्थापनमा समेत समस्या छ । अस्पतालमा दैनिक १० देखि ३० जना भर्ना हुने बिरामी आउने गरेका छन् । उनीहरुलाई खाजा खानाको व्यवस्थासमेत अस्पतालले गर्ने गरेको छ ।
