पोखरा—तनहुँको व्यास नगरपालिकाले वडा नं. १० दुम्सीबजारमा स्थापना गरेको ल्याबले पिसिआर जाँच अनुमति प्राप्त गरेको छ । गण्डकी प्रदेश जनस्वास्थ्य प्रयोगशालाबाट अनुमति प्राप्त भएको व्यास नगरपालिकाका मेयर वैकुण्ठ न्यौपानेले बताए ।
करिब डेढ करोड लागतमा स्थापित ल्याबका लागि प्रदेश सरकारबाट ५० लाख सहयोग प्राप्त भएको मेयर अर्यालले जानकारी दिए । तनहुँ समाज हङकङ र तनहुँ समाज अस्ट्रेलिया, हेफरलगायतबाट १० लाख सहयोग प्राप्त भएको छ । जनप्रतिनिधि, कर्मचारीहरुबाट १३ लाख हाराहारीमा संकलन भएको छ ।
संघ सरकारले दिने भनेको २५ लाख रुपैयाँ भने प्राप्त भइनसकेको उनले बताए । नपुग रकम नगरपालिकाको कोषबाट खर्च गरिएको उनले स्पष्ट पारे ।
ल्याबमा दशैं तिहारसम्म निशुल्क पिसिआर जाँच हुनेछ । तर, सञ्चालन खर्चमा समस्या भए सरकारले तोकेको न्युनतम शुल्क लिनुपर्ने बाध्यता पनि हुन सक्ने मेयर न्यौपालेले बताए । शुल्क लिने वा नलिनेबारे छलफलकै चरणमा रहेको उनको भनाइ छ ।
व्यास नगरपालिका स्वास्थ्य शाखा प्रमुख प्रमोद सोतीले ल्याबमा ५ जना स्वास्थ्यकर्मी र १ जना कार्यालय सहयोगीको व्यवस्था गरिएको जानकारी दिए । उनकाअनुसार १ पटकमा ९६ स्वाबको परीक्षण गर्न सकिने अवस्था छ । स्वाब परीक्षण गरी रिपोर्ट दिन २ देखि साढे २ घन्टा लाग्ने उनले बताए ।
प्रदेश जनस्वास्थ्य प्रयोगशाला निमित्त निर्देशक सपना सुवेदीले स्थानीय तहअन्तर्गत कोभिडसम्बन्धी जाँच (पिसिआर) मात्र गर्न अनुमति दिइएको बताइन् । उनका अनुसार पछि थप व्यवस्थापन भए सञ्चालन हुन सक्ने तर तत्कालका लागि पिसिआर जाँच गर्नमात्र अनुमति प्रदान गरिएको हो । व्यासको प्रयोगशालाको सञ्चालन र व्यवस्थापन नगरपालिकाले गर्नेछ भने गुणस्तर नियन्त्रण भने प्रदेश जनस्वास्थ्य प्रयोगशालाले गर्नेछ ।
गण्डकीमा १ निजी ल्याबले पिसिआर जाँच अनुमति पाएको छ । संघ मातहतको पोखरा स्वास्थ्य प्रतिष्ठानमा पिसिआर जाँच हुन्छ । निर्देशक सुवेदीका अनुसार प्रदेशअन्तर्गत ४ वटा ल्याबमा पिसिआर जाँच हुने गरेको छ ।
