पोखरा—मध्यविन्दु जिल्ला अस्पताल नवलपरासीमा जटिल खालको सफल शल्यक्रिया गरिएको छ । अस्पतालका एमडिजिपी डा. कमलराज न्यौपाने तथा उनको टिमले पहिलोपटक सफलतापूर्वक शल्यक्रिया गरी प्रसुती गराएको हो ।
कावासोती–१२ की २६ वर्षीया मधु सुनारको गर्भमा ४० हप्ता ४ दिनको शिशु रहेको थियो । उनमा जटिल लक्षण इक्लाम्प्सिया देखिएको थियो । ‘बाटो बन्द भएकाले अन्यत्र पठाउने अवस्था पनि भएन्,’ अस्पतालका सुपरिटेन्डेन्ट वीरबहादुर थापाले भने, ‘बिरामी लगभग अचेत अवस्थातर्फ पुगिसक्नुभएको थियो । शल्यक्रिया गर्नुको विकल्प पनि थिएन ।’ पेडियाट्रिक डा.ऋषिकेश रेग्मी भएकाले बच्चा केयरिङमा सहज भएको उनको भनाइ थियो ।
आमा बच्चाको सुरक्षालाई ध्यानमा राखेर अस्पतालका डाक्टरले शल्यक्रियामार्फत् सुरक्षित प्रसुती गराएका हुन् । आमा र बच्चाको स्वास्थ्य अवस्था सामान्य रहेको अस्पतालले जनाएको छ । नवजात शिशुको जन्मदाको तौल ३.३ केजी रहेको थियो ।
सुपरिटेन्डेन्ट डा. थापाका अनुसार अस्पतालमा पूर्ण रुपमा शल्यक्रिया सेवा दिन भने अझै धेरै समय लाग्न सक्छ । उनले भने, ‘हामीसँग जिए मेसिन पनि छैन, आउँदै छ । एनेस्थेसियालोजिस्ट पनि छैन । गाइनेक्लोजिस्ट पनि छैन । फुल फेज हुन त सबै हुनुप¥यो । एनेस्थेसिया एसिस्टेन्ट हुनुहुन्छ हाम्रोमा ।’ गत वर्षको बजेटबाट एनेस्थेसिया मेसिनहरु टेन्डर भएको, आशयपत्र पनि भइसकेको र यो महिनाभित्र आइपुग्ने उनले बताए ।
अहिले मध्यविन्दु अस्पताल कोभिड–१९ डेडिकेडेट अस्पताल भएका कारण प्रसुती सेवा लिन आउनेमा कमी आएको छ । प्रसुती सेवामा संलग्न नर्स नम्रता तिमिल्सिनाका अनुसार कोभिड–१९ कहरभन्दा अघि मासिक १०/१५ जनाले प्रसुती सेवा लिने गरेका थिए । ‘यहाँ शल्यक्रिया गरी उपचार गर्न सकिने अवस्था नभएकाले धेरै जाने बुझेकाहरु त सिधै भरतपुर जाने गर्नुहुन्थ्यो । हामीले सामान्य प्रसुतिमात्रै गराउने गरेका थियौं,’ उनले भनिन् ।
यसअघि अस्पतालमा १५ वैशाखमा ६४ वर्षीय पुरुषको हर्नियाको सफल शल्यक्रिया गरिएको थियो । हर्नियाको शल्यक्रिया नर्मल मानिन्छ । १८ असारमा गरिएको प्रसुती सम्बन्धी शल्यक्रिया भने जटिल प्रकृतिको हो । अस्पतालका सुपरिटेन्डेन्ट थापाले एपेन्डिक्स र हर्नियाका अन्य बिरामीको पनि शल्यक्रियामार्फत सफल उपचार गरिएको जानकारी दिए ।
