पोखरा–पोखरामा अनुमतिबिनै पिसिआर जाँच गरेपछि पोखरा पृथ्वीचोकमा रहेको विध ल्याबको कास्की प्रशासनले सिल गरेको छ । मंगलबार अनुगमनमा गएको टोलीसमक्ष आवश्यक कागजात पेस गर्न नसकेपछि सिल गरिएको कास्कीका सहायक सिडियो श्रीनाथ पौडेलले बताए ।
‘ल्याब सिल गरी ३ दिनभित्र आवश्यक कागजात लिएर जिल्ला प्रशासन कार्यालयमा आउन भनेका छौं । उहाँहरुले कागजात छ त भन्नु भएको छ,’ उनले भने । बिध ल्याबले आवश्यक कागजातसहित सम्पर्क गर्ने अन्तिम म्याद बिहीबारसम्म दिइएको छ ।
ललितपुरमा मुख्य कार्यालय रहेको विधले पोखरामा पनि पिसिआर परीक्षण सुरु गरेको थियो । तर, अनुमति बिनै पिसिआर परीक्षण भएको गुनासो प्रदेश जनस्वास्थ्य प्रयोगशालामा पुगेपछि अनुगमनमा एउटा टोली निस्केको थियो । सामाजिक विकास मन्त्रालय, गण्डकी प्रदेश स्वास्थ्य निर्देशनालय, जनस्वास्थ्य प्रयोगशाला र कास्की प्रशासनबाट प्रतिनिधित्व हुने गरी बनाइएको टिम अनुगमन टिमले आवश्यक कागजात भेटेन ।
विधले मुख्य कार्यालय ललितपुरमा पिसिआर जाँच गर्न अनुमति पाएको भएपनि पोखरामा पिसिआर जाँचका अनुमति पाएको छैन । गत पुसबाट पोखरामा शाखा सञ्चालन गरेको विधले कोरोना दोस्रो भेरियन्ट महामारीको रुपमा फैलिरहँदा विध ल्याब पोखरा शाखाले स्याम्पल संकलन गरी मुख्य कार्यालयमा लगेर जाँच गराउने भनेकोे थियो । तर, पोखराबाटै पिसिआर रिपोर्ट दिने गरेको गुनासो प्रदेश स्वास्थ्य प्रयोगशालामा आएपछि अनुगमन गरिएको प्रदेश स्वास्थ्य प्रयोगशालाकी निमित्त निर्देशक सपना सुवेदीले बताइन् ।
विध ल्याब पोखरा शाखाले ललितपुर पठाउने भन्दै स्याम्पल संकलन गर्ने र पोखरा शाखामै पिसिआर जाँच गर्ने गरेको खुलेको छ । विधले चाडो रिपोर्ट दिने नाममा ललितपुरको मुख्य कार्यालयकै लेटरहेड प्रयोग गरी पोखराबाटै पिसिआर रिपोर्ट दिने गरेको थियो ।
प्रदेश जनस्वास्वास्थ्य प्रयोगशालाका निमित्त निर्देशक सुवेदीले भनिन्, ‘विध ल्याब पोखरा शाखालाई पिसिआर जाँच अनुमति थिएन । २/४ ठाउँबाट गुनासो आएको थियो । पहिला माथि सोधखोज गर्दा पनि पिसिआर गर्न अनुमति नपाएको प्रष्ट भयो । अनुगमनमा जाँदा पनि पोखरामै पिसिआर जाँच र रिपोर्ट दिने गरेको पाइयो,’ उनले भनिन् ।
निमित्त निर्देशक सुवेदीले परीक्षण र रिपोर्ट दिने गरेकोमा प्रक्रिया नपु¥याउँदासम्म परीक्षण नगर्न निर्देशन दिइएको बताइन् ।
यता, विध ल्याबका व्यवस्थापक रवि पोखरेल सरकारले नै ए ग्रेडको अनुमति रोकिदिएकाले यो अवस्था आएको बताउँछन् । उनी भन्छन्, ‘राष्ट्रिय प्रयोगशालाले ए ग्रेडको अनुमति नदिए हामी बी ग्रेडको अनुमति लिन्छौं । स्वाब संकलन गरी ललितपुर नै ल्याउँछौं ।’ उनले रिपोर्ट चाँडो आउने गरेकाले प्रतिस्पर्धी ल्याबहरुले उजुरी गरेको आरोप लगाए । उनले भने, ‘हामीले मेसिन राखेर ट्रायलमात्रै गरेका हौं । त्यही पिसिआर जाँचेको भन्ने चाहिँ होइन ।’
पिसिआर जाँचका लागि राष्ट्रिय प्रयोगशालाबाट अनुमति लिनुपर्ने हुन्छ । पोखरामा पिसिआर जाँचका लागि निजी ल्याब लाइफ केयर डायग्नोस्टिक प्रालिले मात्रै अनुमति पाएको सुवेदीले स्पष्ट पारिन् । लाइफकेयरको प्रत्येक १ महिनामा गुणस्तर जाँच गरिने गरेको उनको भनाइ छ ।
अनुमति पाएको सोही ल्याबले पनि प्रदेश सांसद खिमविक्रम शाहीको रिपोर्ट नियतवश पोजेटिभ निकालेको आरोप लागेको छ । तथापि ल्याबका निर्देशक डा. अमर नागिलाले ल्याबको कुनै कमजोरी नभएको दाबी गरेका थिए ।
