पोखरा—कोरोनाविरुद्धको खोप अभियानको दोस्रो चरणमा गण्डकी प्रदेशले लक्ष्यभन्दा ९.५ प्रतिशत बढीलाई खोप लगाउन सफल भएको छ । गण्डकी प्रदेशको लक्ष्य २५ हजार ८ सय ६४ जनालाई खोप लगाउने रहेकोमा शनिबारसम्म २८ हजार ३ सय २९ जनालाई खोप लगाइएको गण्डकी स्वास्थ्य निर्देशनालयले जनाएको छ ।
निर्देशनालयका अनुसार सबभन्दा बढी कास्कीमा ९ हजार १ सय १७ र सबभन्दा कम मनाङमा ३४६ जनालाई खोप लगाइएको हो । यस्तै, गोरखाका २ हजार ८८, तनहुँका २ हजार ९ सय ७२, नवलपुरका २ हजार ५३, पर्वतका १ हजार ७ सय ७४ जनाले खोप लगाएको निर्देशनालयद्वारा जारी विज्ञप्तिमा उल्लेख छ ।
बागलुङका २ हजार ५ सय ९, मुस्ताङका ४ सय ९३, म्याग्दीका १ हजार ६ सय १०, लमजुङका २ हजार ४ सय ९२ र स्याङ्जाका २ हजार ८ सय ७५ जनाले खोप लगाएका छन् ।
दोस्रो चरणमा स्थानीय तहका कर्मचारी तथा जनप्रतिनिधि, पत्रकार, निजामती सेवा कर्मचारी, बैंक तथा वित्तीय संस्थाका कर्मचारी, नेपाल प्रहरी, सशस्त्र प्रहरी, संस्थान तथा प्राधिकरणका कर्मचारी र पहिलो चरणमा छुटेकाले खोप लगाएको स्वास्थ्य निर्देशक डा. विनोदबिन्दु शर्माले जानकारी दिए । पहिलो चरणमा लक्ष्यभन्दा ७ प्रतिशत बढीलाई खोप लगाएको थियो ।
