ललितपुर—नेपाल मेडिसिटी अस्पतालले संसारकै उत्कृष्ट इजरायली जेब्रा मेडिकल भिजनसँग साझेदारीमा आर्टिफिसियल इन्टेलिजेन्स (एआई)सहितको रेडियोलोजी सेवा सुरु गरेको छ । बिहीबार एक कार्यक्रमका माझ अस्पतालले उक्त सेवाको सुरुवात गरेको हो ।
यो सेवा संसारकै उत्कृष्ट मानिन्छ । यसबाट नेपालीहरुले स्वदैशमै उच्च गुणस्तरीय परीक्षण प्राप्त गर्न सक्ने अपेक्षा गरिएको छ ।
नेपाल मेडिसिटीको रेडियोलोजी तथा इमेजिङ्ग केन्द्र वरिष्ठ रेडियोलोजिष्ट डा. रामकुमार घिमिरेको नेतृत्वमा रहेको छ । उक्त विभागमा आर्टिफिसियल इन्टेलिजेन्ससहितको थप सुरक्षित र गुणस्तरीय एवं विशिष्ट सेवा प्रदान गर्न तयार भएको मेडिसिटीले जनाएको छ ।
मेडिसिटीले पहिलो चरणमा इन्ट्राक्रेनियल हेमोरेज, अस्टियोपोरोसिस र हड्डी सम्बन्धि समस्याको रोकथामका लागि विशेष एल्गोरिथमहरू लागू गर्दैछ भने निकट भविष्यमा क्याल्सियम स्कोरिंगको साथ अपग्रेड गरिने जनाएको छ । यस्तै, यसले हृदय रोग, एन्फाइसेमा र कलेजोमा असर सम्बन्धि समस्या पत्ता लगाउन यसले सहयोग गर्ने अस्पतालले जनाएको छ ।
