बुटवल—ट्याक्टरमा प्रसव पीडाले छट्पटाइरहेकी महिलालाई बोकिन्छ भन्ने कुरा सुन्दा विश्वास नलाग्न सक्छ । अझ तराईकै जिल्लामा यस्तोसम्म हुन्छ भन्ने सुन्दा पत्याउनै मुश्किल पर्छ ।
तर, कपिवस्तुको विजयनगर गाउँपालिमा एक महिलाले ट्यक्टरमै बच्चा जन्माएकी छन् । विजयनगर गाउँपालिका वडा नं. ५ कटुवा गाउँकी उर्मिला कोरीले गत शनिबार ट्याक्टर मै सुत्केरी भइन् ।
यो समस्या उनको मात्र होइन् । विजयनगर गाउँपालिकाका स्थानीयहरुको यस्तै समस्या भोग्नु परिरहेको छ । गाउँपालिकामा एउटा एम्वुलेन्ससमेत नहँुदा स्थानीय जीवनमरणको जोखिम लिन बाध्य छन् ।
गाउँपालिकामा एम्वुलेन्स त छैन् नै गतिलो स्वास्थ्य संस्था समेत नहुँदा समस्या हुने गरेको स्थानीय महेश कलवार बताउँछन् । गाउँपालिकाले हालसम्म एम्बुलेन्स खरिद नगर्दाको पीडा आफूजस्तै अरु गाउँपालिकावासीको रहेको उनको भनाइ छ ।
स्थानीयहरु बिरामी हुँदा सकेसम्म घरमै उपचारको प्रयास गर्छन् । अन्तिम परे मात्र ट्याक्टर वा अन्य सवारी साधनमा अस्पताल लग्ने गरेका छन् । उनीहरु उपचारका क्रममा भगवान कै भरोसमा गर्ने गरेको सुनाउँछन् ।
गाउँमा हुने यस्तै समस्याका लागि भने विजयनगर गाउँपालिकाले एम्बुलेन्स खरिद र संचालनका लागि प्रयास र पहल भैरहेको बताउँदै आएको छ । चालु आर्थिक वर्षमा एम्बुलेन्स खरिदका लागि गाउँपालिकाले १५ लाख बजेट विनियोजन समेत गरेको छ । तर, नतिजा भने देखिएको छैन् ।
यस वर्ष दातृ निकायबाट सहयोग प्राप्त भयो भने २ वटा एम्बुलेन्स संचालन हुने गाउँपालिका अध्यक्ष गोपालबहादुर थापाले बताए । ‘हाम्रो मात्र बजेटले अलि अपुग होलाजस्तो भयो । दातृ निकायले सहयोग गरेमा हामी एम्वुलेन्स खरिदको तयारीमा छांै,’ उनले भने ।
