काठमाडौं—ललितपुरको सानेपास्थित स्टार हस्पिटलले ‘स्टार एश्योरेन्स’मार्फत स्वास्थ्य विमा सुरु गरेको छ । शनिबार एक कार्यक्रममाझ अस्पतालले उक्त बिमा कार्यक्रम सुरु गरेको हो ।
शिखर बिमा र नागरिक जीवन बिमा कम्पनीसँगको साझेदारीमा सुरु गरिएको स्टार एश्योरेन्समा स्वास्थ्य बिमा नगद रहित सेवा, जीवन बिमा गम्भीर रोगको निम्ति र कल्याण स्वास्थ्य योजनाहरु रहेका छन् ।
राष्ट्रियसभामा अध्यक्ष गणेश तिमिल्सिनाले उक्त नागरिक विमा कार्यक्रमको उद्घाटन गरेका थिए । सो क्रममा उनले नेपालको सरकारको भावना प्रतिबिम्बित गर्ने काम निजी क्षेत्रबाट आरम्भ गरेकोमा अस्पतालको प्रशंशा गरे ।
कार्यक्रममा स्वास्थ्य तथा जनसंख्या राज्यमन्त्री नवराज रावत, सांसद कृष्ण महर्जन र प्रदेशसभा सदस्य राजकाजी महर्जन, ललितपुर नगरपालिकाका मेयर चिरीबाबु महर्जनले पनि मन्तब्य राखेका थिए ।
कार्यक्रममा शिखर बिमाका सिईओ दीपप्रकाश पाण्डे र नागरिक जीवन बिमाका सिईओ पोषकराज पौडेलले स्टार एस्युरेन्स सेवालाई विस्तार गर्न जोड दिएका थिए ।
उक्त समारोहमा अस्पतालका अध्यक्ष किशोर महर्जनले अस्पतालले नेपाली नागरिकहरुलाई सेवा उपलब्ध गराउन सम्भव भएसम्म प्रयास गर्ने बताए । यस्तै अस्पतालका प्रबन्ध निर्देशक डा. शैल रुपाखेतीले अस्पतालले उत्कृष्ट सेवा दिइरहेको जानकारी गराउँदैं अतिथी र सहभागीहरुको स्वागत गरेका थिए ।
ललितपुरको सानेपास्थित स्टार हस्पिटल सन् २००६ मा स्थापना भएको हो । १ सय सैय्याको उक्त अस्पतालमा २२ वटा विशेष केन्द्रहरु, बहिरंग र अन्तरंग सेवाहरु पनि सञ्चालनमा छन् ।
