काठमाडौं—नेपाल मेडिकल काउन्सिलले एमबीबीएस उत्तीर्ण गरेका विद्यार्थीहरुको नियमित लिने लाइन्सेन्स परीक्षामा सरकारी मेडिकल कलेज र प्रतिष्ठानमा अध्ययन गर्ने विद्यार्थी नै बढी उत्तीर्ण भएको पाइएको छ । नेपालका मेडिकल कलेजहरुको तीन वटा लाइसेन्स परीक्षाका सहभागी, उत्तीर्ण र अनुत्तीर्ण विद्यार्थीहरुको तथ्यांक विश्लेषण गर्दा सरकारका मेडिकल कलेजमा अध्ययन गरेका चिकित्सक बढी पास भएको पाइएको हो ।
हेल्थ आवाजले प्राप्त गरेकोे उक्त नतिजामा नेपालका मेडिकल कलेजबाट एमबीबीएस उत्तीर्ण गरेर २०१८ को अगष्ट, डिसेम्बर र २०१९ को अप्रिलमा भएको लाइसेन्स परीक्षामा सहभागी १ हजार ३ सय ५१ मध्ये ७ सय २० जनाले मात्र पास गरेका छन् । जुन कुल सहभागीको ५३ प्रतिशत हुन आउँछ ।
परीक्षामा सहभागीमध्ये त्रिवि चिकित्साशास्त्र अध्ययन संस्थान (आईओएम)को महाराजगञ्ज मेडिकल क्याम्पसबाट एमबीबीएस उत्तीर्ण गरी परीक्षामा सहभागी भएका ९४.४ प्रतिशत पास भएका छन् । त्यसैगरी, दोस्रोमा नेपाल आर्मीको मेडिकल कलेजबाट उत्तीर्ण एमबीबीएस विद्यर्थी रहेका छन् ।
त्यहाँबाट सहभागीमध्ये ९३.८ प्रतिशतले लाइसेन्स परीक्षा उत्तीर्ण गरेका छन् । त्यसैगरी, तेस्रोमा पाटन स्वास्थ्य विज्ञान प्रतिष्ठान, चौथोमा विपी कोइराला स्वास्थ्य विज्ञान प्रतिष्ठान रहेको छ ।
एमबीबीएस पास भएर लाइसेन्स परीक्षामा सहभागी भएकामध्ये सबैभन्दा कमजोर विद्यार्थी जानकी मेडिकल कलेजमा बाट पास भएका देखिएका छन् । तीन वटा परीक्षामा सहभागी ८७ विद्यार्थीमध्ये १५ जना मात्र लाइसेन्स परीक्षामा उत्तीर्ण भएका छन् । जुन जम्मा सहभागीको १७ प्रतिशत मात्र हुन आउँछ ।
त्यसैगरी, लाइसेन्स परीक्षामा सहभागीमध्ये कम उत्तीर्ण हुनेमा कलेज अफ मेडिकल साइन्सेज २२ प्रतिशत, नोवेलबाट २६ प्रतिशत, नेसनल मेडिकल कलेजबाट उत्तीर्ण २९ प्रतिशत रहेका छन् ।
