काठमाडौं—स्वास्थ्य तथा जनसंख्या मन्त्रालयद्धारा अस्पताल संचालन स्वीकृत पाएका शिक्षण अस्पतालले अनुमतिभन्दा ४५० शैय्या बढी संचालनमा ल्याएको देखिएको छ । स्वास्थ्य तथा जनसंख्या मन्त्रालयले तयार पारेको सूचीमा अधिकांश शिक्षण अस्पतालले आफूले पाएको संचालन स्वीकृतीभन्दा दोब्बर बढी बेड चलाएको देखिएको छ ।
कतिपयले भने एमबीबीएस कोटा घटेसँगै बेड संख्यामा पनि कटौती गरेका छन् । शिक्षण अस्पताल संचालनका लागि कम्तिमा पनि ३ सय वेड आवश्यक पर्छ । त्यसको स्वीकृत स्वास्थ्य तथा जनसंख्या मन्त्रालयले दिने गरेको छ ।
मेडिकल कलेजहरुले स्वास्थ्य मन्त्रालयमा ७५० देखि ९११ शैय्याको स्वीकृत मागेका छन् । मन्त्रालयका नीति योजना तथा अनुगमन महाशाखा प्रमुख डा. विकास देवकोटाका अनुसार कतिपय मापदण्ड नपुगेका कारण स्वीकृत नपाएका हुन् । आवश्यक मापदण्ड पुगेको खण्डमा मन्त्रालयले अनुगमन गरी आवश्यक शैय्या संचालनको अनुमति दिनेछ ।
बिना स्वीकृत तोकेभन्दा बढी वेड चलाउनु नियम विपरित भएको मन्त्रालयको ठहर रहेको छ । ०७० यता मन्त्रालयले शिक्षण अस्पतालहरुको अनुगमन गरेको छैन ।
‘हामीले ३ सय शैय्याभन्दा बढीको स्वीकृती दिएका छैनौं,’ एक अधिकारीले भने, ‘तर, उहाँहरुले ७५० संचालन गर्नुभएको छ ।’ कतिपय मेडिकल कलेजले नौं सय शैय्या संचालनको अनुमति मन्त्रालयलाई मागेका छन् । मेडिकल कलेजहरुले एक विद्यार्थी बराबर ५ शैय्याका दरले वेड संख्या बनाएका थिए । १५० विद्यार्थी हुँदा ७५० शैय्या संचालनमा थिए ।
तर, उक्त शैय्या संचालन पनि गैरकानुनी भएको मन्त्रालयका अधिकारीहरु बताउँछन् । पछिल्लो समय विद्यार्थीको संख्या १०० मा झरेपछि केही कलेजले अस्पतालको शैय्या पनि ५ सयमा झारेको पाइएको छ ।
