बुटवल—लुम्बिनी प्रादेशिक अस्पताल बुटवलमा बिरामीको चिकित्सकीय लापरवाहीले भएको भन्दै आफन्तले शव उठाउन मानेका छैनन् । रुपन्देहीको कञ्चन गाउँपालिकाकी १५ वर्षीय माया थापाको शनिबार राति उपचारकै क्रममा मृत्यु भएको थियो । अस्पतालले लापरवाही गरेका कारण बिरामीको मृत्यु भएको भन्दै आफन्तहरुले शव बुझ्न इन्कार गरेका छन् ।
आफन्तले घटनाको सत्य तथ्य छानबिन गरी दोषीमाथि कारबाहीसहितका माग राख्दै दिनभर अस्पतालमा धर्ना बसे । आफन्तहरुले मृतकका परिवारका एक सदस्यलाई रोजगारीको व्यवस्था गर्नुपर्ने, मृतकका परिवारलाई क्षतिपूर्ति दिनुपर्ने र उपचार खर्च मिनाह गर्नुपर्नेलगायतका माग राख्दैं आएका छन् । माग पुरा नभएसम्म शव नउठाउने आफन्तले अडान लिएका छन् । मृतकका आफन्त र अस्पताल प्रशासनबीच वार्ताको प्रयास भएपनि सहमति हुन नसकेपछि विगत ३ दिनदेखि मृतकको शव अस्पतालमै रहेको छ ।
अस्पताल प्रशासनले आफूहरुका जायज मागप्रति बेवास्ता गरेको भन्दै मृतकका आफन्तहरुले मंगलबारदेखि पुनः अस्पतालमा धर्ना दिने बताएका छन् । मृतकका आफन्तहरुले आइतबार पनि दिनभर अस्पतालमा धर्ना दिएका थिए ।
मंसिर १८ गते ज्वरो आएर लुम्बिनीमा भर्ना हुन आएकी रुपन्देहीको कञ्चन गाउँपालिकाकी १५ वर्षीय थापाको शनिबार राति मृत्यु भएको थियो । बिरामीको रोग पत्ता नलगाई चिकित्सकले जथाभावी औषधी चलाइएकाले छोरीको मृत्यु भएको आमा सीता थापाको दाबी छ ।
१८ गते इमर्जेन्सीमा भर्ना भएकी मायालाई १९ गते अस्पतालको वेडमा सारिएको थियो । समस्या देखिएपछि उनलाई पुन २० गते आकस्मिक रुपमा आईसीयुमा राखेको मृतक थापाकी आमा सीता बताउँछिन् ।
बिरामी थापालाई ७ दिनदेखि ज्वरो आउनुका साथै शरीरमा प्लेटलेसको मात्र कमी भएका कारण फोक्सोमा ‘एआरडिएस’ भएकोले बिरामीको मृत्यु भएको अस्पतालका मेडिकल सुपरिटेन्डेन्ट डा. राजेन्द्र खनालले बताए ।
