काठमाडौं—बलात्कारको प्रयास गरेको आरोपमा नेपाल मेडिसिटी अस्पतालबाट प्रहरीले एक जना चिकित्सकलाई पक्राउ गरेको घटनाप्रति नेपाल चिकित्सक संघ (एनएमए)ले चासो व्यक्त गरेको छ ।
बिहीबार संघका महासचिव डा. लोचन कार्कीले एक विज्ञप्ति जारी गर्दै विरामी जाँच गर्दा एकजना चिकित्सकलाई प्रहरीले हिरासतमा लिई थुनामा राखेको सन्दर्भमा नेपाल चिकित्सक संघको गम्भीर ध्यानाकर्षण भएको जनाएका छन् ।
उसले विद्यमान संशोधित मुलुकी अपराध संहिता ऐन विपरित अस्पतालजस्तो संवेदनशील क्षेत्रमा बिरामी चेकजाँच गरिरहेको अवस्थामा चिकित्सकलाई विना कुनै अनुसन्धान पक्राउ गरेको भन्दैं विरोध जनाएको हो । संघले संशोधित मुलुकी अपराध संहिता ऐन बमोजिम कानुनी कारवाही अगाडि बढाएर कानुनी राज्यको प्रत्याभूति दिलाउन पनि सरकारसँग माग गरेको छ ।
संशोधित अपराध संहितामा चिकित्सकले चिकित्सकीय लापरवाही गरेको आरोप लागेमा नेपाल मेडिकल काउन्सिलले तोकेको विज्ञ चिकित्सकको संयोजत्वमा ५ सदस्सीय अनुसन्धान समिति गठन गर्ने र उक्त समितिले कसुरद्धार ठहर गरेमा मुद्धा चलाइने पाउने प्रावधान छ । तर, अस्पतालमा चिकित्सकबाट हुने महिला दुर्व्यवहारका घटनामा भने उक्त कानुनले बोलेको छैन् ।
बलात्कार प्रयास गरेको आरोपमा पक्राउ परेका ती चिकित्सकलाई नेपाल मेडिसिटी अस्पतालले भने सेवाबाट हटाइसकेको छ ।
