बुटवल—विगत लामो समयदेखि आन्दोलनमा रहेका युनिर्भसल कलेज अफ मेडिकल साइन्सेज भैरहवाका विद्यार्थीहरुले सरकारसँग भएको सम्झौताप्रति असहमति जनाएका छन् । सम्झौता विद्यार्थीको पक्षमा नरहेको भन्दै बिहिवार कलेजका विद्यार्थीहरुले सम्झौतापत्र जलाएर विरोध प्रर्दशन गरे ।
उनीहरुले सरकारले कलेज संचालकहरुसँग गरेको सम्झौताले विद्यार्थीको मागको सम्बोधन नभएको जनाउँदै आन्दोलन नरोक्ने बताएका छन् । ‘सरकारले मेडिकल माफियाहरुसँग मिलेर विद्यार्थीहरुको माग सम्बोधन नहुने गरि सम्झौता गरेको छ । यसमा हाम्रो समर्थन छैन्,’ एक विद्यार्थीले भने, ‘आन्दोलनलाई निरन्तरता दिन्छौँ ।’
विद्यार्थीहरुले एमवीवीएस अध्ययनका लागि सरकारले तोकेको भन्दा झन्डै १५ लाख शुल्क बढी संचालकहरुले लिएको भन्दै आन्दोलन गरिरहेका छन् । सरकारले मेडिकल कलेज संचालकहरुसँग बढी लिएको शुल्क समायोजन गर्ने सहमति गरेको थियो । सहमतिमा पहिलो र दोस्रो वर्षको मात्र बढी शुल्क लिएको फिर्ता हुने र अरु फिर्ता नहुने सरकार र मेडिकल कलेजहरुको सम्झौतामा उल्लेख छ ।
विद्यार्थीहरुले सो सम्झौता आफूहरुलाई मान्य नहुने बताउँदै आफ्ना माग पूरा नभएसम्म आन्दोलन जारी राख्ने बताएका हुन् । रिले अन्सनमा बसेका बिद्यार्थीहरु बिहिवार प्लेकार्डसहित आन्दोलनमा उत्रिएका थिए । एक महिनादेखिको आन्दोलनका कारण कलेजमा पठन–पाठन ठप्प छ ।
