बुटवल—युनिभर्सल कलेज अफ मेडिकल साइन्सेस शिक्षण अस्पताल भैरहवामा विद्यार्थीको लगातारको आन्दोलनका कारण पठनपाठन ठप्प भएको छ । सरकारले तोकेभन्दा क्याम्पस प्रशासनले लिएको बढी शुल्क फिर्तालगायत ६ बुँदे माग राखेर विगत दुई हप्तादेखिको आन्दोनका कारण कलेजको पठनपाठन पूर्णरुपमा अवरुद्ध भएको हो ।
माग पूरा गर्न दबाब दिन विद्यार्थीहरुले केहि दिनअघि क्याम्पस प्रमुख र सहायक क्याम्पस प्रमुखको कार्यकक्ष, प्रशासन शाखा, लेखा शाखा र मानव संशाधन शाखामा तालाबन्दी गरेका विद्यार्थीहरुले शुक्रवारदेखि रिले अनशन समेत सुरु गरेका छन् । तालाबन्दी कायमै रहेपनि क्याम्पस प्रशासनले प्रशासनिक तथा अन्य काम भने सुचारु गरेको छ । विद्यार्थीहरुले प्रशासनले काम नरोकेर आन्दोलनलाई बेवास्ता गरेको आरोप लगाउँदै रिले अनसन सुरु गरेको विद्यार्थीहरु बताउँछन् ।
विद्यार्थीका जायज माग सम्बोधनका औपचारिक वार्तामा समेत नबोलाएको विद्यार्थीको आरोप छ । प्रशासनले भने अस्पतालजस्तो संवेदनशील क्षेत्रमा बन्द हड्तालजस्ता गतिविधि उचित नहुने बताउँदै आएको छ ।
कलेजको मुख्य गेट अगाडि ‘न्यायका लागि संघर्ष’ नारा लेखिएको कालो ब्यानर टाँगेर विद्यार्थीहरु अनसनमा बासेका छन् । रिले अनसनमा एमबीबीएस, बीडीएस, नर्सिङ र प्यारामेडिक्स अध्ययनरत विद्यार्थी सहभागी छन् ।
विद्यार्थीहरुले क्याम्पसले लिएको बढी शुल्क फिर्ता वा समायोजन, परीक्षा शुल्क त्रिभुवन विश्वविद्यालयले तोकेअनुसार लिनुपर्ने, विशेष कारणवश आन्तरिक परीक्षामा सहभागी हुन नपाएका विद्यार्थीलाई विश्वविद्यालयको परीक्षामा सहभागी गराइनुपर्नेलगायतका माग राखेका छन् ।
उपत्यकाभित्र एमबीबीएसका लागि ३८ लाख ५० हजार र उपत्यकाबाहिर ४२ लाख ५० हजार शुल्क लिन पाउने सरकारी सीमा छ । युनिभर्सल मेडिकल कलेजले प्रतिविद्यार्थी कम्तीमा १० लाखदेखि अधिकतम १५ लाख रुपैयाँसम्म बढी शुल्क लिएको एमबीबीएस अध्ययनरत विद्यार्थीहरुको दावी छ ।
