काठमाडौं—नेपाल चिकित्सक संघ (एनएमए) लुम्बिनीले आवासीय चिकित्सकहरुलाई सरकारी मेडिकल अधिकृतसरह निर्वाह भत्ता दिने सरकारको निर्णय कार्यन्वयन माग गर्दै जिल्ला प्रशासन कार्यलय रुपन्देहीमा ज्ञापनपत्र बुझाएको छ । बिहीबार एनएमए लुम्बिनीको टोलीले प्रमुख जिल्ला अधिकारीलाई ज्ञापनपत्र बुझाएको हो ।
ज्ञापनपत्रमा चिकित्सा शिक्षा आयोगको १६ औं पूर्ण बैठकको निर्णय कार्यन्वयन नहुनु र आन्दोलनरत आवासीय चिकित्सकहरुको माग सम्बोधन गर्न राज्य देखाएको उदासिनताप्रति एनएमए लुम्बिनीको गम्भीर ध्यानाकर्षण भएको उल्लेख छ । साथै, एनएमए लुम्बिनीले केन्द्रीय कार्यलयले घोषणा गरेका कार्यक्रममा ऐक्यबद्धता जनाउँदैं शाखाअन्तर्गत सम्पूर्ण चिकित्सकहरुलाई आन्दोलनमा सहभागी हुन आग्रहसमेत गरेको छ ।
एनएमएले निजी मेडिकल कलेजमा काम गर्नेबाहेकका सम्पूर्ण चिकित्सकलाई आकस्मिक तथा सघन उपचार सेवाबाहेकका सम्पूर्ण काम छोडी संघर्षमा आउन आव्हान गरेको छ । यस्तै, १२ बैशाखदेखि देशभरका आकस्मिक तथा सघन उपचार सेवाबाहेक सम्पूर्ण स्वास्थ्य सेवा ठप्प हुन बाध्य पार्ने चेतावनीसमेत दिएको छ ।
एनएमए लुम्बिनीका अध्यक्ष डा. कृष्ण खरेल र महासचिव डा. प्रकाश बस्नेतद्वारा हस्ताक्षरित ज्ञापनपत्र एनएमए लुम्बिनीका उपाध्यक्ष डा. वर्षा थापा, महासचिव प्रकाश बस्नेत, कोषाध्यक्ष डा. रमेश भट्टरराई र राष्ट्रिय चिकित्सक संघ लुम्बिनीका महासचिव डा. सम्राट पराजुलीसहितको टोली जिप्रका पुगेर प्रमुख जिल्ला अधिकारीलाई बुझाएको थिए ।
