काठमाडौं—नेपाल चिकित्सक संघको आसन्न महाधिवेशनमा अध्यक्षका लागि लोकतान्त्रिक खेमाबाट डा. लोचन कार्की उम्मेदवार बन्ने भएका छन् ।
बिहीबार बसेको उम्मेदवार छनोट गर्ने अधिकार पाएको वर्तमान तथा पूर्व अध्यक्षहरुको समितिले डा. कार्कीलाई अध्यक्षको उम्मेदवार बनाउने निर्णय गरेको हो ।
डा. कार्की हाल नेपाल चिकित्सक संघको महासचिव छन् । डा. कार्कीसँगै अध्यक्षको उम्मेदवारका लागि बरिष्ठ चिकित्सक डा. भूपेन्द्र बस्नेतले पनि दाबी गरेका थिए । स्रोतकाअनुसार डा. भूपेन्द्रलाई अर्को कार्यकालका लागि अध्यक्षको उम्मेदवार बनाउने गरी सहमति भएको हो ।
‘आज बसुन्धराको विपी स्मृती अस्पतालमा बसेको बैठकले अध्यक्षको उम्मेदवारबारे निर्णय गरेको छ,’ संघका अध्यक्ष डा. मुक्तिराम श्रेष्ठले भने, ‘अन्य उम्मेदवारहरु पनि अब घोषणा गर्दै जान्छौं ।’
अहिलेसम्म लोकतान्त्रिकबाट महासचिवका लागि ५ जना आकांक्षी देखिएका छन् ।
नेपाल चिकित्सक २००७ सालमा स्थापना भएको नेपालको पहिलो व्यवसायिक संस्था हो । संघको आगामी २८ औं केन्द्रीय महाधिवेसन आगामी माघमा हुँदैछ ।
