काठमाडौं—शहीद गंगालाल राष्ट्रिय हृदय केन्द्रले १५ वर्षमुनिका बालबालिकाको मुटु उपचारमा सरकारले छुट्याएको बाहेक थप खर्च लागेको कसरी व्यवस्थापन गर्ने भन्ने विषयमा अध्ययन गर्न उपसमिति बनाउने भएको छ । मंगलबार बसेको अस्पताल विकास समितिको बैठकले थप रकम आवश्यक परेमा कसरी व्यवस्थापन गर्ने भन्ने विषयमा अध्ययन गर्न उपसमिति बनाउने निर्णय गरेको हो ।
‘सरकारले बालबालिकाको मुटुको उपचारका लागि २ लाख ५० हजार रुपैयाँ सहायता दिदैं आएको छ,’ अस्पतालका कार्यकारी निर्देशक डा. रवि मल्लले भने, ‘कतिपय बालबालिकाको उपचारमा त्यो भन्दा बढी पनि खर्च हुन्छ । कसैको उपचारमा ५—६ लाख रुपैयाँ खर्च हुन्छ, त्यो अपुग रकम कसरी व्यवस्थापन गर्ने भन्ने विषयमा अध्ययन गर्न उपसमिति बनाउने निर्णय भएको छ ।’
गंगालाल अस्पताल विकास समितिका अध्यक्ष अध्यक्षसमेत रहेका स्वास्थ्य तथा जनसंख्यामन्त्री प्रदीप पौडेलले अध्यक्षतामा उक्त बैठक बसेको थियो ।
सरकारले हाल स्वास्थ्य तथा जनसंख्या मन्त्रालयमार्फत केन्द्रलाई पाँच सय बालबालिकाको शल्यक्रियासहितको मुटु उपचारका लागि प्रति बालबालिका दुई लाख ५० हजार रुपैयाँका दरले सहायता रकम उपलब्ध गराउँदैं आएको छ ।
केहीको हकमा त्यो रकम अपुग हुने भएपछि केन्द्रले थप रकम कसरी जुटाउने भन्ने विषयमा अध्ययन गर्नका लागि उपसमिति बनाउन लागेको हो ।
