काठमाडौं—संसदको शिक्षा, स्वास्थ्य तथा सूचना प्रविधी समितिबाट गेटास्थित शहीद दशरथ चन्द स्वास्थ्य विज्ञान विश्वविद्यालय विधेयक पारित भएको छ । बुधबार बसेको समितिको बैठकले शहीद दशरथ चन्द स्वास्थ्य विज्ञान विश्वविद्यालय विधेयक पारित गरेको हो ।
विधेयक पारित भएपछि अब प्रतिनिधीसभामा उक्त विधेयकमाथि छलफल हुनेछ । प्रतिनिधीसभाबाट पारित भएर प्रमाणिकरण भएपछि यो कानुनका रुपमा लागु हुनेछ ।
समितिले चाँडै विधेयकलाई प्रतिनिधीसभामा लैजाने तयारी गरेको छ । कानुन अभावमा निर्माण सकिएपनि ६ अर्ब बढीका भौतिक संरचना गेटामा पूर्ण रुपमा सञ्चालनमा आउन सकेका छैनन् ।
गेटालाई मुलुककै पहिलो स्वास्थ्य विज्ञान विश्वविद्यालयका रुपमा विकास गर्ने निर्णय सरकारले गरेको छ । त्यसका लागि गेटामा अस्पताल सञ्चालनमा ल्याइसकिएको छ ।
गेटामा बनेका ठूला साना ५३ वटा संरचनाबाट प्रशासनिक कार्यलय, मेडिकल कलेज शिक्षण अस्पताल, शैक्षिक कार्यक्रमलगायतका कुरा सञ्चालन गर्ने तयारी छ ।
