काठमाडौं– राष्ट्रिय अभियान सुरु भएको ६ दिनमा पाठेघरको मुखको क्यान्सर विरुद्धको खोप एचपीभी लगाउने किशोरीको संख्या १० लाख पुगेकोमा प्रधानमन्त्री केपी शर्मा ओलीले खुसी व्यक्त गरेका छन् । मंगलबार सामाजिक संजाल फेसबुकमा उनले खोप अभियान सुरु भएको ६ दिनमा १० लाख किशोरीले खोप लगाइसकेको उल्लेख गरेका छन् ।
‘माघ २२ गतेबाट देशभर सुरु भएको एचपीभी खोप अभियान उत्साहका साथ सञ्चालन भइरहेको छ । हालसम्म १० लाख किशोरीहरुले यो खोप लिइसकेका छन्,’ सामाजिक सञ्जालमा प्रधानमन्त्री ओलीले लेखेका छन्, ‘अभियान फागुन ६ गतेसम्म चल्नेछ । खोप लगाउन यस अभियानमा संलग्न हुनुभएका व्यवस्थापक, स्वास्थ्यकर्मी, स्वयंसेवक, शिक्षक, अभिभावक तथा सरकारी तथा गैरसरकारी सबै निकायलाई धन्यवाद !’
सरकारले कक्षा ६ देखि १० कक्षासम्मका छात्रा तथा विद्यालय बाहिरका १० वर्षदेखि १४ वर्ष उमेरका किशोरीहरुलाई एचपीभी खोप लगाउने अभियान सुरु गरेको हो ।
यस वर्ष १६ लाख ८० हजार रुपैयाँ किशोरीलाई खोप लगाउने सरकारले लक्ष्य लिएको छ । आगामी वर्षदेखि भने नियमित खोप अभियानमा यसलाई समेट्ने तयारी गरेको छ ।
