धनगढी—स्वास्थ्य तथा जनसंख्या मन्त्रालयले गत कात्तिक अन्तिम साता कैलालीस्थित गेटा अस्पतालको निर्देशकमा ११ औं तहका चिकित्सक डा. अशोक श्रीपाईली नियुक्त गरेको थियो । निर्देशक नियुक्त भएको तीन महिना नबित्दैं डा. श्रीपाईलीले निर्देशकबाट राजीनामा दिएका छन् ।
उनले ६ माघमा स्वास्थ्य तथा जनसंख्या मन्त्रालयलाई गेटा अस्पतालको निर्देशकको जिम्मेवारी राजीनामा बुझाइसकेका छन् । उनले गेटा अस्पतालमै कार्यरत वरिष्ठ रेडियोलोजिष्ट डा. होमप्रसाद पन्तलाई निमित्त निर्देशकको जिम्मेवारी दिएका छन् ।
खरिदमा शक्तिकेन्द्रको दबाबलाई थेग्न नसकेर राजीनामा बुझाएको भनिएपनि डा. श्रीपाईली स्वयंले भने यस विषयमा केही बोल्न चाहेनन् । तर, निर्देशकले राजीनामा दिएर अस्पताल निमित्तको भरमा चलेको तीन साता बितिसक्दा पनि स्वास्थ्य मन्त्रालयले अझै नयाँ निर्देशक पठाउन सकेको छैन ।
बरु, मन्त्रालयका प्रवक्ता डा. प्रकाश बुढाथोकी सरकारले दिएको जिम्मेवारीबाट पन्छिन नमिल्ने तर्क गर्छन् । ‘जिम्मेवारी लिएको पत्र लिनुभयो तर दिएको जिम्मेवारीबाट अहिले पन्छिनु हुँदैन,’ उनी भन्छन्, ‘मन्त्रालयमा उहाँको राजीनामाका विषयमा कुनै निर्णय भएको छैन ।’
गत आर्थिक वर्षको १ कार्तिकबाट न्यूनतम सेवासहित सञ्चालनमा आएको अस्पतालले विभिन्न सेवाहरु थप गर्दै गइरहेको भएपनि पूर्ण रुपमा सञ्चालनमा आउन सकेको छैन । अस्पताल पूर्ण रुपमा सञ्चालनमा नआउँदैं पटक—पटक हुने निर्देशक परिवर्तन र नेतृत्वबिहीनताले समस्या निम्त्याउँदैं आएको छ ।
अस्पताल पूर्ण रुपमा सञ्चालनका लागि इमर्जेन्सी, इन्डोरसँगै माइनर शल्यक्रिया कक्ष तयारी अवस्थामा छन् । अस्पतालकाअनुसार आईसीयु, भेन्टिलेटर, एनआईसीयु, सीसीयुसँगै पोष्ट अप बेड तयारी अवस्थामा रहेको र अक्सिजन प्लान्ट निर्माणाधीन अवस्थामा छ ।
