वीरेन्द्रनगर—कर्णाली प्रदेश सरकारले स्वास्थ्य पूर्वाधार निर्माणलाई प्राथमिकतामा राखेको छ । चालु आर्थिक वर्षको नीति तथा कार्यक्रम र बजेटमा समेटेर स्वास्थ्य पूर्वाधार निर्माण योजनालाई प्राथमिकतामा राखेको हो ।
आर्थिक वर्ष २०८०/०८१ मा बहुवर्षीय र स्रोत सुनिश्चितता भएका ठूला पूर्वाधार योजनालाई अघि बढाउने नीतिअनुरूप स्वास्थ्य पूर्वाधार निर्माण योजनालाई अघि बढाउन लागिएको हो । जीर्ण भवनबाट सेवा प्रवाहमा समस्या उत्पन्न हुँदा स्वास्थ्य सेवालाई सर्वसुलभ, पहुँचयोग्य र प्रभावकारी बनाउन स्वास्थ्य पूर्वाधार निर्माण योजनालाई प्राथमिकतामा राखेको प्रदेश सरकारले जनाएको छ ।
नयाँ पूर्वाधार निर्माणभन्दा पनि बनिरहेका पूर्वाधार निर्माणलाई प्राथमिकतामा राखेर निर्माण भवन गरिने सामाजिक विकास मन्त्रालयले जनाएको छ । चार वटा जिल्ला अस्पताल भवन निर्माणको निरन्तरताका लागि यो वर्ष बजेट विनियोजान गरिएको छ ।
उक्त भवन निर्माणको निरन्तरताका लागि २५ करोड ५० लाख बजेट विनियोजन गरिएको मन्त्रालयका प्रवक्ता एवम् स्वास्थ्य शाखा प्रमुख वृषबहादुर शाहीले बताए । ‘भवन निर्माण कार्यको निरन्तरताका लागि स्वास्थ्य सेवा कार्यालय दैलेख, रूकुमपश्चिम, हुम्ला र सल्यानका लागि बजेट विनियोजन गरिएको छ । पर्याप्त भवन नहुँदा प्रभावकारी सेवा दिन सकिएको छैन्,’ उनले भने, ‘यो वर्ष वहुवर्षीय र स्रोत सुनिश्चितता भएका योजनामा मात्र बजेट विनियोजन गरिएको छ ।’
सरकारले पर्याप्त बजेट विनियोजन गरेपनि निर्माण व्यवसायीको लापरवाहीका कारण जिल्ला–जिल्लाका अस्पताल भवन निर्माणमा भने ढिलाइ भइरहेको छ । जिल्ला अस्पताल दैलेखमा म्याद थप गरेर भवन निर्माणको काम अगाडि बढेको छ ।
प्रदेश सरकारले चालु आर्थिक वर्षमा भवन निर्माणको निरन्तरताका लागि १० करोड रुपैयाँ बजेट पठाएको स्वास्थ्य सेवा कार्यालय दैलेखका प्रमुख डा. रत्नवीर सुनारले बताए । उनका अनुसार भवन निर्माणको काम निकै सुस्त गतिमा भइरहेको छ । हालसम्म ४५ प्रतिशत मात्र भौतिक प्रगति भएको छ ।
