जुम्ला—कर्णाली स्वास्थ्य विज्ञान प्रतिष्ठानका कुलपतिसमेत रहेका प्रधानमन्त्री केपी शर्मा ओलीले प्रतिष्ठानको नवर्निमित शैक्षिक भवनको उद्घाटन गरेका छन् । बिहीबार विहान प्रतिष्ठानको पहिलो दीक्षान्त समारोहमा सहभागी हुन जुम्ला पुगेका प्रधानमन्त्री ओलीले प्रतिष्ठानको सुविधायुक्त शैक्षिक भवन उद्घाटन गरेका हुन् ।
प्रतिष्ठानको पहिलो दिक्षान्त समारोह, सिनेट बैठकलगायतका कार्यक्रममा सहभागी हुन प्रधानमन्त्री बुधबार जुम्ला पुगेका हुन् ।
भवन उद्घाटन भएलगत्तै प्रतिष्ठानको सिनेट बैठक सुरु भएको छ । सिनेट बैठकपछि दीक्षान्त समारोह सुरु हुनेछ ।कर्णाली स्वास्थ्य विज्ञान प्रतिष्ठानले डेढ दशकपछि बल्ल आफ्नै सुविधायुक्त शैक्षिक भवन पाएको छ । वि.सं. २०६८ सालमा स्थापना भएको कर्णाली प्रतिष्ठान हालसम्म भाडाकै घरबाट अध्ययन—अध्यापनका क्रियाकलाप संचालन गर्दै आएको थियो । तर, झण्डै १३ वर्षपछि भने प्रतिष्ठानले अध्ययन—अध्यापन गर्नका लागि आफ्नो नयाँ शैक्षिक भवन पाएको हो ।
प्रतिष्ठानमा चिकित्सा शिक्षाका एक दर्जन बढी स्नातक र स्नातकोत्तर तहका कार्यक्रम संचालन छन् । त्यसका लागि १०० प्रोफेसर छन् । तर, प्रतिष्ठानको आफ्नै आवास भवन र शैक्षिक भवन नहुँदा घर भाडामा लिनुपर्ने बाध्यता थियो । आफ्नो शैक्षिक भवन र स्टाफ क्वार्टर नहुँदा प्रतिष्ठानले भाडामा मात्रै वर्षेनी करोडौ खर्चिन बाध्य छ ।
जुम्लामा आउने प्रोफेसरहरुलाई टिकाई राख्न, प्रतिष्ठानमा संचालित कार्यक्रमहरुलाई दिगो रुपमा संचालन गर्न समस्या हुने गरेको थियो । सोही कारण प्रतिष्ठानले आफ्नै शैक्षिक, प्रशासनिक तथा आवास भवन बनाउन थालेको थियो ।
