काठमाडौं—कर्णाली स्वास्थ्य विज्ञान प्रतिष्ठान र डक्टर फर नेपाल (डिएफएन)ले चार जना चिकित्सकलाई छात्रवृत्तिमा विशेषज्ञ चिकित्सक अध्ययन गराउने भएको छ । विशेषज्ञ चिकित्सक उत्तीर्ण भएपछि कर्णाली स्वास्थ्य विज्ञान प्रतिष्ठानले खटाएको स्थानमा कम्तिमा ३ वर्ष काम गर्ने सर्तमा चिकित्सकहरुलाई निशुल्क विशेषज्ञ चिकित्सा पढाउन सुरु गरेको हो ।
प्रतिष्ठान र डक्टर फर नेपालले विभिन्न निजी मेडिकल कलेजमा अध्ययन गरिरहेका चार जना चिकित्सकहरुसँग आइतबार त्रिपक्षीय सम्झौता गरेको हो । त्रिपक्षीय सम्झौतामा प्रतिष्ठानका तर्फबाट प्रशासकीय अधिकृत अमृत भण्डारी, डक्टर फर नेपालबाट नाइजेल लयर्स र अध्ययन गर्ने चिकित्सकहरुले हस्ताक्षर गरेका छन् ।
छात्रवृत्ति पाउने चिकित्सकहरुमा जुम्लाकी डा. श्रृजना रावल छिन् । उनी काठमाडौं विश्वविद्यालयअन्तर्गत धुलिखेलमा स्त्री तथा प्रसूति रोग विशेषज्ञ अध्ययन गर्दैछिन् । त्यसैगरी, जुम्लाकै अर्की चिकित्सक डा. नविता रावल लुम्बिनी मेडिकल कलेजमा स्त्री तथा प्रसूति रोग विशेषज्ञ अध्ययन गर्दैछिन् ।
मुगुकी डा. मिना काफ्ले चौलागाई नेशनल मेडिकल कलेज वीरगञ्जमा एमडिजिपी अध्ययन गर्दैछिन् भने कालिकोटकी डा. ज्वाला बराल चितवन मेडिकल कलेजमा मानसिक रोग विशेषज्ञ अध्ययन गर्दैछिन् ।
उनीहरु चारै जनाको विशेषज्ञ चिकित्सक अध्ययन गर्न लाग्ने खर्च (होस्टलसहित) प्रतिष्ठान र डिएफएनले आधा—आधा व्यहोर्ने छन् । अध्ययन गर्ने चिकित्सकको खर्च दुवै संस्थाले सिधैं अध्ययन गरिरहेको संस्थालाई उपलब्ध गराउने छन् ।
लामो समयदेखि नेपालको कर्णाली (पूरानो कर्णाली)मा स्नातक तहका चिकित्सा तथा नर्सिङ्ग छात्रवृत्ति दिदैं आएको डिएफएनले यस वर्षदेखि विशेषज्ञ चिकित्सकलाई पनि छात्रवृत्ति सुरु गरेको हो । डिएफएनले यस अहिलेसम्म झण्डै ४० जनालाई चिकित्सक तथा नर्स बनाइसकेको र अन्य अध्ययन गरिरहेको संस्थाकी अध्यक्ष डा. कटी यरोले जानकारी दिइन् ।
विशेषज्ञ छात्रवृत्ति अध्ययन र त्यसपछिको तीन वर्षे करार सम्झौताले कर्णालीका १३ जिल्लामा हुने चिकित्सक अभावलाई कम गर्ने उनको भनाइ छ ।
