शरीरमा कुनै पनि किसिमका रोगहरु लागेमा यसको प्रतिक्रिया छाला, नङ र कपालबाट पनि थाहा पाउन सकिन्छ । शरीरको बाहिरी भागमा रहने छालालाई शरीरको ऐनाको रुपमा पनि लिइन्छ ।
छाला हाम्रो स्वास्थ्यसँग मात्र नभई सौन्दर्य र व्यक्तित्वसँग पनि जोडिएको हुन्छ । त्यसैले हामीले सदैव यसको विशेष ध्यान राख्नु पर्दछ ।
जाडोमा छालाको स्याहार गर्नुपर्ने हुन्छ । अधिकांश व्यक्तिलाई जाडोमा छाला सम्बन्धि विभिन्न समस्याहरु देखा पर्ने हुन्छ । उनीहरुमा विशेषगरी, छाला सुख्खा हुने, फुस्रो देखिने, फुट्ने र चिलाउनेजस्ता समस्याहरु देखा पर्छन् ।
तसर्थ, यस्ता समस्याहरु नदेखियोस् भन्नका निमित्त अन्य समयभन्दा यस समयमा फरक किसिमले आफ्नो छालाको हेरचाह गर्नु पर्दछ ।
कारणहरु
जाडोयाममा हावामा आद्रताको कमी हुने भएकोले हावा सुख्खा हुने गर्छ । जसको प्रभाव शरीरमा पनि देखा पर्दछ । यस्ता समस्या देखा पर्नुको अन्य मुख्य कारणहरुः
- शरीरमा पानीको कमी हुनु
- तातो पानीले नुहाउनाले
- एसी र हिटरको बढी प्रयोग
- छालालाई सुख्खा तथा खुल्ला राख्नाले
- रसायनयुक्त साबुन तथा क्रिमहरुको प्रयोग
- उचित खाद्यान्नको अभाव
- थाइराइड तथा मधुमेह रोगका कारण ।
कसरी गर्ने जाडोमा छालाको हेरचाह
जाडोयाममा हामीले गर्ने विभिन्न क्रियाकलापकै माध्यमबाट पनि छालाको उचित केयर गर्न सकिन्छ । यसको निमित्त सर्वप्रथम हामीले छालालाई सुख्खा हुन नदिन छालाको प्रकृतिअनुसारको क्रिम तथा लोसनहरुको प्रयोग गर्नुपर्दछ ।
यसका लागि छाला सुख्खा हुनेहरुले बढी पानी भएको लोसन तथा क्रिमहरुको प्रयोग गर्नुपर्छ भने ओइली स्कीन हुनेहरुले जेल बेस मोस्चराइजर क्रिमहरुको प्रयोग गर्नुपर्दछ । यसबाहेक जाडो महिनामा अधिकांश व्यक्तिहरुले पानी कम पिउँछन् । यस समयमा अधिकांश व्यक्तिहरु आफ्नो प्रायजसो समय एसी तथा हिटरहरुमा बिताउने भएकाले यस्तो क्रियाकलापले पनि हाम्रो शरीरको पानी सोस्छ ।
जसबाट पनि छाला सुख्खा हुन जान्छ । र, यस्तो हुन नदिनको निमित्त पनि हामीले शरीरलाई आवश्यक पानी प्रशस्त मात्रामा पिउनु पर्दछ । तर, धेरैजसोले जाडोयाममा पानी धेरै खान रुचाउँदैनन् । तसर्थ, उनीहरुले भने पानीको सट्टामा समय समयमा ग्रीन टी, लेमन टी र अन्य घरेलु सुपहरु पिउनाले पनि पानीको कमी पूरा गर्न सक्छन् ।
जाडोमा देखिने अर्का समया छाला फुट्ने तथा चिलाउने पनि एक हो । यसो हुन नदिन हामीले आफूले प्रयोग गर्ने साबुन परिवर्तन गरी रसायनहिन तथा लाइट साबुनको प्रयोग गर्दै युरियायुक्त मोस्चराइजर क्रिमको उपयोग गर्नु पर्दछ । र, शरीरमा सिधै ऊनजन्य कपडाले छुँदा यसले शरीर चिलाउने र फुस्रो बनाउने भएकोले हामीले शरीरको भित्री भागमा प्रकृतिकजन्य कटनको कपडा लगाई शरीरको सन्तुलन मिल्ने मनतातो पानीले शरीर पखाल्नु पर्दछ ।
हामी जाडोबाट जोगिनको निमित्त घाम पनि ताप्ने गर्छाै । तर, चर्किएको घाम सिधै हाम्रो छालामा पर्दा यसले डढाउने र छिट्टै चाउरी पार्दछ । यसको निम्ति हामीले प्रत्येक ३÷४ घण्टामा हाई एसपीएपको सनब्लक क्रिमको प्रयोग गरी छाला ढाकेर मात्रै घाम ताप्नु पर्दछ ।
मधुमेह र थाइराइडका बिरामीको शरीर जाडोयाममा झन् बढी सुख्खा हुने भएकोले उनीहरुले पनि बढी मोस्चराइजर भएको क्रिमको प्रयोग गर्नुपर्दछ । यसका साथै शरीर सुख्खा नहोस् भन्नका लागि यस्ता बिरामीले ओमेगा माछा तथा माछाको तेल, एभोकाडो, सुन्तला, अमला, गाँजर, गोलभेडा र भोगटेजस्ता भिटामिन ए र सी पाइने खानाहरु खादा पनि यसले उनीहरुको शरीरलाई फाइदा पुर्याउँछ ।
